بنگلورو،13؍جون(ایس او  نیوز) بنگلورو شہر کی چامراج پیٹ عید گاہ میں شرپسندانہ سرگرمیوں پر نظر رکھنے کے لئے ہفتہ کے روز محکمہ پولیس کی طرف سے نصب کروائے گئے سی سی ٹی وی کیمروں کے کھمبوں کو شرپسندوں نے گرا دیا ہے۔

بتایا جاتا ہے کہ پولیس کے سخت بندوبست اور کل ہندو شدت پسندوں کی مزاحمت کے باوجود اس میدان میں صورتحال پر نظر رکھنے کے لئے سی سی ٹی وی کیمرے نصب کروائے گئے لیکن ہفتہ اور اتوار کی درمیانی رات شرپسندوں نے عید گاہ میدان میں لگائے گئے سی سی ٹی وی کیمروں کو توڑ کر گرا دیا۔ان کھمبوں کو جب ہفتہ کے روز لگایا جا رہا تھا تو شدت پسندوں نے عید گاہ میں گھس کر اس کی مخالفت کرنے کی کوشش کی۔ اتوار کی صبح جب میدان میں حسب معمول کچھ لڑکے کرکٹ کھیلنے کے لئے پہنچے تو انہوں نے دیکھا کہ گزِشتہ روز سی سی ٹی وی کیمرے لگانے کے لئے جو کھمبے نصب کئے گئے تھے ان کو گرا دیا گیا ہے۔

پولیس نے کہا کہ اس عید گاہ میں سی سی ٹی وی کیمرے پہلے ہی فٹ پاتھ پر نصب کئے گئے تھے، ان کو بدلنے کے لئے کل کام کیا جا رہا تھا جس کی مقامی لوگوں نے مخالفت کی۔ پولیس اس معاملہ کی جانچ کر رہی ہے کہ کس نے ان سی سی ٹی وی کیمروں کے لئے بنائے گئے کھمبوں کو گرا یا ہے۔یا درہے کہ گزشتہ چند دنوں سے چامراج پیٹ عید گاہ سرخیوں میں ہے۔ اس میدان کی ملکیت کو لے کر بی بی ایم پی کے ایک سینئر آفیسر کی متنازعہ بیان بازی کی وجہ سے فرقہ پرست تنظیموں کے حوصلہ بڑھ گئے ہیں۔

ان کی طرف سے مانگ کی جا رہی ہے کہ چونکہ بی بی ایم پی کے افسر نے کہا ہے کہ یہ ایک عوامی میدان ہے، اس لئے اس میدان میں یوم یوگا، گنیش تہوار اور دیگر تقاریب کے اہتمام کی بھی اجازت دی جائے۔ تاہم اس عید گاہ کی ملکیت کے متعلق سپریم کور ٹ کے فیصلہ کی روشنی میں سی ایم اے کا کہنا ہے کہ یہ ایک وقف املاک ہے،اس لئے وہاں ایسی کسی بھی سرگرمی کی اجازت نہیں دی جا سکتی۔