بنگلورو،21؍جون (ایس او نیوز) شہر کو لنگنا مکی ڈیم سے پانی فراہم کرنے کامنصوبہ ہے۔اس کیلئے افسروں کو تفصیلی پراجکٹ رپورٹ (ڈی پی آر) تیار کرنے کیلئے ہدایت دی گئی ہے۔ یہ بات نائب وزیراعلیٰ ڈاکٹر جی پرمیشور نے کہی۔ بنگلور کودرپیش پانی کے مسئلے کے حل کے لئے لنگنا مکی ڈیم سے پانی فراہم کرنے کے سلسلے میں جی ایم آر ڈی اے دفتر میں افسروں کے ساتھ اجلاس کے بعد انہوں نے اخباری نمائندوں سے کہا کہ بنگلور شہر نہایت تیزی کے ساتھ پھیل رہا ہے۔ شہرمیں فی الحال کاویری ندی سے 1400ایم ایل ڈی پانی فراہم کیا جارہا ہے۔ اس کے باوجود پانی کی قلت ہے۔کئی علاقوں میں کاویری ندی کا پانی فراہم کرنا ممکن نہیں ہورہا ہے۔ کاویری ندی سے پانی فراہم کرنے کے پانچویں مرحلے سے زیادہ سے زیادہ 800ایم ایل ڈی پانی ہی حاصل ہورہا ہے۔ اس کے علاوہ پہلے اور دوسرے مرحلے کی اسکیم کے تحت پانی کی فراہمی میں کمی ہوئی ہے۔ اس لئے دیگر ذرائع سے پانی حاصل کرنا ضروری ہوگیا ہے۔اس سے قبل تیاگراج کمیٹی کی رپورٹ میں بتایا گیا تھا کہ لنگنا مکی ڈیم سے پانی فراہم ہوسکتا ہے۔ رپورٹ کا جائزہ لینے کے بعد افسروں کواس سلسلے میں ڈی پی آر تیارکرنے کی ہدایت دی گئی ہے۔ لنگنا مکی ڈیم بنگلور شہر سے تقریباً 300کلو میٹر دوری پر ہے۔ وہاں سے پانی سپلائی کرنے کیلئے 12ہزار کروڑ روپئے کی لاگت کا اندازہ ہے۔ تاہم حتمی رقم ابھی طے نہیں کی گئی ہے۔ انہوں نے کہا کہ اس ڈیم کااستعمال صرف بجلی کی پیداوار کیلئے کیا جارہا ہے۔ سارا پانی سمندر میں بہہ جاتا ہے۔ اس ڈیم کے ذریعہ آبپاشی کی بھی کوئی اسکیم نہیں ہے۔ بنگلور کیلئے یہاں سے پانی جاری ہونے پر کسانوں کو بھی کوئی دشواری نہیں ہوگی۔ انہوں نے کہا کہ یتناہولے آبی منصوبے سے بھی 2.5ٹی ایم سی پانی حاصل ہورہا ہے۔ لیکن یہ پانی بھی بنگلور کیلئے ناکافی ہے۔ اس لئے لنگنا مکی ڈیم سے پانی حاصل کرنے کا منصوبہ بنایا گیا ہے۔