کشمیر میں ایک روزہ ہڑتال کے بعد معمولات زندگی بحال
سری نگر،10؍جولائی (ایس او نیوز؍یو این آئی) حزب المجاہدین کمانڈر برہان وانی کی تیسری برسی کے موقع پر یک روزہ وادی گیر ہڑتال کے بعد منگل کی صبح ہی وادی میں معمولات زندگی بحال ہوئی، بازاروں میں رونق لوٹ آئی، ٹرین اور موبائل انٹرنیٹ سروسز بحال ہوئیں اور جنوبی کشمیر کے ترال اور شہر خاص کے چار تھانوں کے تحت آںے والے علاقوں سے کرفیو جیسی پابندیاں ہٹائی گئیں۔
بتادیں کہ حکام نے پیر کے روز حزب المجاہدین کمانڈر برہان وانی کی تیسری برسی کے موقع پر مشترکہ مزاحمتی قیادت کی طرف سے دی گئی ہڑتال کال کے پیش نظر ممکنہ احتجاجی لہروں کی روک تھام کو ممکن بنانے کے لئے جنوبی کشمیر کے ترال علاقے اور شہر خاص کے صفا کدل، رعناواری، نوہٹہ اور خانیار پولس تھانوں کے تحت آنے والے علاقوں میں کرفیو جیسی پابندیاں عائد کی تھیں۔
موصولہ اطلاعات کے مطابق منگل کی صبح سے ہی شہر سری نگر کے تمام بازاروں میں حسب معمول گہماگہمی شروع ہوئی، سڑکوں پر ٹرانسپورٹ کی نقل وحمل جاری رہی، بنکوں اور دیگر سرکاری ونجی دفاتر میں کام کاج بحال ہوا اور تعلیمی اداروں میں بھی درس وتدریس کا سلسلہ بحال ہوا۔
شہر خاص کے نوہٹہ، خانیار، صفا کدل اور رعناواری پولس تھانوں کے تحت آنے والے علاقوں سے کرفیو جیسی پابندیاں ہٹائی گئی اور حساس مقامات اور چوراہوں پر بچھائی گئی خار دار تار کو بھی ہٹایا گیا۔ نوہٹہ میں واقع جامع مسجد جس کے دروازوں کو پیر کے روز مقفل کیا گیا تھا، کو منگل کے روز کھول دیا گیا اور جامع مسجد کی طرف جانے والے راستوں سے بھی بندشوں کو ہٹایا گیا۔
ایک پولس افسر نے بتایا کہ منگل کے روز شہر سری نگر کے کسی بھی علاقے میں کسی قسم کی پابندیاں عائد نہیں ہوں گی۔ وادی میں ٹرین سروس بھی یک روزہ معطلی کے بعد منگل کو بحال ہوئی۔ ریلوے کے ایک عہدیدار نے بتایا کہ وادی میں منگل کے روز تمام ٹریکوں پر ریل سروس حسب معمول چلے گی۔ انہوں نے بتایا کہ پیر کے روز ہڑتال کے پیش نظر وادی میں لوگوں، ریلوے عملے اور املاک کے تحفظ کے تئیں ٹرین سروس کو معطل رکھنے کا فیصلہ لیا گیا تھا۔
جنوبی کشمیر کے چاروں اضلاع پلوامہ، اننت ناگ، شوپیاں اور کولگام کے تمام بازاروں میں منگل کی صبح ہی معمولات بحال ہوئے، تمام بازار کھل گئے، سڑکوں پر ٹرانسپورٹ کی نقل حمل جاری رہی اور سرکاری دفاتر وبنکوں میں بھی کام کاج بحال ہوا اور تعلیمی ادارے بھی کھل گئے نیز ترال قصبے میں عائد کرفیو جیسی پابندیوں کو ہٹایا گیا۔
شمالی کشمیر کے تینوں اضلاع کپواڑہ، بارہمولہ اور بانڈی پورہ سے بھی یک روزہ ہڑتال کے بعد معمولات زندگی بحال ہونے کی اطلاعات ہیں۔ وسطی کشمیر کے دیگر دو اضلاع گاندربل اور بڈگام میں بھی یک روزہ ہڑتال کے بعد منگل کے روز معمولات زندگی بحال ہوگئے، بازاروں میں تمام دکانیں کھل گئیں اور سڑکوں پر ٹرانسپورٹ بحال ہوگیا۔
