بنگلورو،18؍مارچ (ایس او نیوز) کانگریس پارٹی کی نمائندگی والے ٹمکور لوک سبھا حلقہ جے ڈی ایس کے لئے چھوڑدےئے جانے پر مقامی قائدین میں سخت ناراضی دکھائی دے رہی ہے۔ ٹمکور پارلیمانی حلقہ کے جے ڈی ایس کے حق میں جانے پر نائب وزیراعلیٰ جی پرمیشور نے سخت اعتراض جتایا۔ کانگریس قائدین کے رویہ پر نالاں جی پرمیشور کو منانے کی کوشش کی گئی ہے۔ آج صبح سداشیونگر میں واقع پرمیشور کی رہائش گاہ میں کے پی سی سی کے صدر دنیش گنڈوراؤ نے ملاقات کی۔ ایک گھنٹہ سے زائد وقت تک تبادلہ خیال کرتے ہوئے پرمیشور کو منانے کی کوشش کرتے رہے۔ اس موقع پر دنیش گنڈوراؤ نے کہا کہ پارٹی کے اعلیٰ قائدین نے اتحادی سمجھوتہ کے تحت ٹمکور حلقہ جے ڈی ایس کے لئے چھوڑا ہے۔ موجودہ رکن پارلیمان مدوہنومے گوڈا کو پارٹی میں مناسب وموزوں مقام دیاجائے گا۔ اس کے باوجود پرمیشور بضدرہے کہ مدے ہنومے گوڈا کوہی پارٹی کا ٹکٹ دیاجائے۔ پرمیشور کے اصرار سے پارٹی ہائی کمان تشویش میں مبتلا ہوگیاہے۔ ایک طرح سے ریاستی وسینئر قائدین کو یہ مسئلہ سلجھانامشکل محسوس ہورہاہے۔ ٹمکور حلقہ کے سلسلہ میں کچھ بھی ہوسکتا ہے۔ گنڈوراؤ نے اس موقع پر ایک نیا شوشہ چھوڑتے ہوئے نامہ نگاروں سے کہا کہ آخری لمحہ میں کچھ بھی ہوسکتا ہے۔ فی الوقت پرمیشور سے ملاقات کرکے تمام تفصیلات سے آگاہ کردیاگیاہے، حلقہ کی صو رتحال اوراتحادی سمجھوتہ سے متعلق تمام باتیں واضح طورپر بتائی گئی ہیں۔ آخر میں انہوں نے کہا کہ پرچہ نامزدگی داخل کرنے کی آخری تاریخ ختم ہونے میں ابھی دودن باقی ہیں۔ آخری وقت میں کچھ بھی ہوسکتا ہے۔ بس انتظارکرو اور دیکھو آخرمیں کیاہوتا ہے۔