اگنی پتھ اسکیم: کانگریس اتوار کو جنتر منتر پر احتجاج کرے گی: ملیکارجن کھرگے
کلبرگی،18؍جون (ایس او نیوز؍ایجنسی) قائد اپوزیشن راجیہ سبھا ملیکارجن کھرگے نے مسلح افواج میں بھرتی کے لئے اگنی پتھ اسکیم متعارف کرانے پر مرکزی حکومت کو نشانہ ئ تنقید بنایا اور کہا کہ ان کی پارٹی اتوار کے دن سے نئی دہلی کے جنتر منتر پر احتجاج شروع کرے گی۔
انہوں نے کہا کہ مسلح افواج میں 4 سال کی نوکری اور اس کے بعد ریٹائر کردیا جائے تو کوئی بھی فوجی اچھی طرح تربیت یافتہ نہیں نکلے گا۔ کانگریس قائد نے ہفتہ کے دن کہا کہ کنٹراکٹ یا یومیہ اجرت پر مسلح افواج میں فوجیوں کی بھرتی ٹھیک نہیں۔ سیکوریٹی فورسس کو جاننے میں امیدواروں کو زیادہ وقت درکار ہوتا ہے۔
اگر انہیں 4 سال بعد فورس چھوڑنے کو کہا جائے تو یہ کیسے ممکن ہے؟۔ انہوں نے کہا کہ کانگریس اگنی پتھ اسکیم کے خلاف اتوار سے نئی دہلی کے جنتر منتر پر احتجاج شروع کررہی ہے۔ فوج میں بھرتی کے خواہشمند کسی توقع کے بغیر خود کو ملک کے لئے قربان کرنے تیار رہتے ہیں۔ کیا ان سے کنٹراکٹ مزدور جیسا سلوک ٹھیک ہوگا؟۔
یہ نوجوان ٹریننگ کے لئے ٹیوشن سنٹرس کو بھاری فیس ادا کرتے ہیں۔ 4 سال میں ان کی فیس تک نہیں نکل پائے گی۔ یہ اسکیم نوجوانوں کے لئے کبھی بھی قابل قبول نہیں ہوگی۔ اس معاملہ میں سیاست نہیں ہونی چاہئے۔ بی جے پی ایسی اسکیم متعارف کراکر نوجوانوں کو اکسارہی ہے۔
احتجاج پُرتشدد ہوتا جارہا ہے۔ مرکزی حکومت نے ماضی قریب میں کوئی بھرتی نہیں کی۔ مسلح افواج میں روزگار کے لاکھوں مواقع ہیں۔ کرناٹک میں مرکزی حکومت کی کئی جائیدادیں مخلوعہ ہیں۔ بھرتی کے لئے کوئی قدم نہیں اٹھایا جارہا ہے۔