بنگلورو، 12؍اکتوبر (ایس او نیوز) ریاستی وزیر برائے صحت وخانداین بہبود ڈاکٹر کے سدھاکر نے بتایاکہ مرکزی حکومت نے عالمی یوم نفسیاتی صحت کے پیش نظر ”ٹی۔منس“ نامی اسکیم جاری کی ہے جس کے لئے کرناٹک میں جاری ای۔ منس اسکیم مشعل راہ ہے۔ نیشنل انسٹی ٹیوٹ آف مینٹل ہیلتھ اینڈ نیورو سائنس (نمہانس) کے کانوکیشن اجلاس سے خطاب کرتے ہوئے ڈاکٹر سدھاکر نے اس خیال کا اظہارکیا۔

انہوں نے کہاکہ آج عالمی یوم نفسیاتی صحت منایا جارہا ہے اور ریاست میں ای۔ منس پروگرام کے تحت سافٹ ویر استعمال کرکے نفسیاتی صحت کی سرگرمیوں پر نگاہ رکھی جارہی ہے۔ انہوں نے بتایاکہ رگوں کے امراض کے تعلق سے مسائل سے ملک میں برین ہیلتھ انشیٹیو جاری کیا گیا ہے۔ انہوں نے کہاکہ جسمانی صحت کے ساتھ ساتھ نفسیاتی صحت بھی بہتر ہونی چاہئے۔

ڈاکٹر سدھاکر نے بتایاکہ کووڈ کے موقع پر کئی افراد نفسیاتی دباؤ کا شکار ہوگئے جس کے لئے نمہانس اور ریاستی حکومت کی جانب سے ٹیلی کونسلنگ کا آغاز کیاگیا اور اب تک 23لاکھ ٹیلی کنسلٹیشن کئے گئے ہیں۔ کانوکیشن اجلاس میں کئی طلبہ کو ڈگریوں اور تمغوں سے نوازا گیا۔