بنگلورو،15/فروری(ایس او نیوز) ریاست میں پہلی مرتبہ وزیر اعلیٰ بی ایس ایڈی یورپا اس سال مارچ کی پانچ تاریخ کو اپنے سالانہ اصل بجٹ کے ساتھ ہی بچوں کے لئے مستقل بجٹ بھی پیش کرنے والے ہیں۔ اس طرح جاریہ سال کرناٹک، چوتھی ریاست بننے جارہی ہے جو بچوں کے لئے مستقل بجٹ پیش کرے گی، اس سے قبل کیرلا، بہار اور آسام نے بچوں کا بجٹ پیش کیا ہے۔ذرائع کے مطابق ریاستی محکمہ مالیات نے بچوں کا بجٹ تیار کرنے کے سلسلہ میں محتلف متعلقہ افراد و اداروں کے ساتھ تبادلہ خیال شروع کر دیا ہے۔ذرائع کا کہنا ہے کہ بچوں کو درپیش مسائل اور چیلنجوں کا حل تلاش کرنے کے سلسلہ میں ضروری اقدامات اور مختلف اہداف سے متعلق اس میدان میں کام کرنے والے مختلف افراد اور اداروں کی طرف سے مشورے آنے شروع ہو گئے ہیں۔ امید کی جا رہی ہے کہ اس بجٹ میں اسکولوں میں تعلیمی معیار کے حصول کے علاوہ تعلیم اور تغذیہ کے معاملات پر خصوصی توجہ دی جائے گی، ان کے علاوہ دوسرے میدانوں میں بچہ مزدوری کا خاتمہ، کم عمر بچوں کی شادیوں پر روک، بچوں کی تسکری سے حفاظت اور سب کے لئے مفت بنیادی تعلیم کی فراہمی وغیرہ شامل ہیں۔