بنگلورو،22/نومبر(ایس او نیوز) حالیہ برسوں میں سڑک حادثات بکثرت پیش آرہے ہیں - پیش آمدہ حادثات کے پیش نظر قومی سطح پر ایک سروے کے ذریعہ سڑک حادثات کی کثرت والی ریاستوں کی فہرست تیار کی گئی ہے- مذکورہ فہرست میں ریاست کرناٹک چوتھے مقام پرہے- گزشتہ 5برسوں کے دوران ریاست میں 2.2لاکھ حادثات پیش آئے ہیں جن میں 54 ہزار سے زائد افراد ہلاک ہوئے ہیں - 2018 کے دوران حادثات کی تعداد میں کمی آئی تھی- 2017 میں 42,542 حادثات پیش آئے تھے- جبکہ 2018 میں یہ تعداد گھٹ کر 41,707 ہوئی ہے- تاہم ہلاک ہونے والے افراد کی تعداد میں اضافہ ہوا ہے- 2018کے دوران 10,990اور 2017کے دوران 10,609افراد مختلف سڑک حادثات میں ہلاک ہوئے تھے- وزارت روڈ ٹرانسپورٹ اور نیشنل ہائی وے اتھارٹی آف انڈیا کی تجزباتی رپورٹ میں یہ بات سامنے آئی ہے- تمل ناڈو، مدھیہ پردیش، اترپردیش اور کیرلا ریاستوں میں مئی، جون اور جولائی کے ماہ میں زیادہ سڑک حادثات پیش آئے ہیں - اس بات کا خلاصہ بھی مذکورہ تجزیاتی رپورٹ میں کیا گیاہے-