بنگلورو: دوبارہ ہورہا ہے کورونا معاملات میں اضافہ ۔ ریاستی حکومت نے جاری کیں نئی پابندیاں
بنگلورو،13؍مارچ (ایس او نیوز) ریاست میں کووِڈ کے معاملات میں اضافہ کو دیکھتے ہوئے حکومت نے عوامی اجتماعات میں شرکاء کی تعداد پر نئی پابندیاں عائد کی ہیں۔
محکمہ صحت کے سیکریٹری جاوید اختر کی جانب سے جاری کیے گئے سرکیولر میں کہا گیا ہے کہ ریاست کے مختلف شہروں اور قصبوں میں اور بالخصوص بنگلورو میں کورونا کے معاملات میں اضافہ دیکھنے میں آیا ہے۔ اس لئے اب شادیوں اور دیگر سماجی و ثقافتی تقریبات میں زیادہ سے زیادہ 200 افراد ہی جمع ہوسکیں گے۔ خیال رہے کہ اس سے لاک ڈاون شرائط میں ڈھیل دئے جانے کے بعد کسی ہال یا بند احاطے میں 500 افراد تک جمع ہونے کی اجازت دی گئی تھی۔ سرکیولر میں مزید ہدایت دی گئی ہے کہ بند احاطے میں منعقدہ جنم دن کی تقریبات یا فوت ہونے والوں کی آخری رسومات اور تدفین کے موقع پر 50 افراد ہی شریک ہوسکیں گے ۔ اور اگر ایسی تقریبات یا جلسے کھلے احاطے میں منعقد ہوتے ہیں جہاں پر سماجی فاصلہ برقرار رکھنا اور کووِڈ پروٹوکول پر عمل کرنا ممکن ہو تو وہاں پر زیادہ سے زیادہ 100افراد کو شریک ہونے کی اجازت رہے گی۔
محکمہ صحت نے کیرالہ اور مہاراشٹرا سے لگے ہوئے سرحدی اضلاع میں کووِڈ جانچ کا ٹارگیٹ بھی بڑھا دیا ہے۔ اس کے علاوہ بنگلورو سمیت ریاست کے تمام اسٹار ہوٹلوں اور ریستوراں میں رات بھر چلنے والی پارٹیوں پر بھی حکومت نے پابندی لگا دی ہے۔
جمعرات کے دن بنگلورو میں کورونا کے 526 نئے معاملات سامنے آتے تھے جس کے ساتھ بنگلورو میں اب تک متاثر ہونے کی تعداد 4,10181 ہوگئی، جبکہ شفایاب ہونے والوں کی تعداد 3,99,656 رہی۔
اور اگر پوی ریاست کی بات کریں تو جمعرات کے دن 833 نئے معاملے سامنے آئے جس کی وجہ سے ریاستی سطح پر متاثرین کی تعداد 9,58,417 ہوگئی جبکہ شفایاب ہونے والوں کی تعداد 9,37,898 ہوگئی ہے جس میں سے 8,114 معاملے فی الحال پوزیٹیو ہیں۔