بنگلور: بے نامی شکایتوں پر کارروائی نہ کرنے کا سرکیولر جاری ہونے پرسرکاری ملازمین کو راحت
بنگلورو،5؍نومبر(ایس او نیوز) ریاستی حکومت نے کرناٹک کے سرکاری ملازمین کو ایک بہت بڑی راحت دیتے ہوئے یہ حکم جاری کیا ہے کہ آئندہ سرکاری ملازمین کے خلاف ملنے والی کسی بھی بے نامی شکایت کو خاطر میں نہ لایا جائے۔ اس سلسلہ میں حکومت کی طرف سے تمام محکموں کو جاری کئے گئے سرکیولر میں کہا گیا ہے کہ سرکاری ملازمین کی طرف سے کسی کوتاہی، لاپروائی یا دیگر خامیوں کے بارے میں کوئی بھی شکایت موصول ہو تو اسے اس وقت تک زیر غور نہ لایاجائے جب تک کہ اس شکایت میں فریاد کرنے والے کا نام، پتہ اور دیگر تفصیلات فراہم نہ کی جائیں۔
اگر کوئی تفصیل نہیں دی جا رہی ہے اور صرف نام دے کر شکایت کی گئی ہے تو اس کو خاطر میں نہ لایا جائے۔ ملازمین کے خلاف شکایت درج کرنے والوں کو اس شکایت کے ساتھ اپنی شناخت کا دستاویز بھی منسلک کرنا لازمی قرار دیا گیا ہے اور کہا گیا ہے کہ بار بار سرکاری ملازمین کے خلاف گمنام شکایتوں کی وجہ سے محکموں میں کام کاج متاثر ہو ں گے۔ حکومت کی طرف سے جاری کیا گیا یہ سرکیولر ملازمین کے لئے بہت بڑی راحت ہے۔