بنگلور 29/مئی (ایس او نیوز) آج جمعہ کو کرناٹکا میں  سب سے زیادہ یعنی 248 کورونا کے کیسس ریکارڈ کئے گئے، جس کے ساتھ ہی کرناٹک میں کورونا سے متاثرہ لوگوں کی تعداد بڑھ کر  2,781 ہوگئی ہے۔

ذرائع سے ملی اطلاع کے مطابق آج چکبالاپور میں ایک پچاس سالہ خاتون کورونا کا شکار ہوگئی، اس کی موت کے ساتھ ہی  کرناٹک میں کورونا سے مرنے والوں کی تعداد بڑھ کر  48 ہوگئی ہے، جبکہ کورونا سے اب تک 894 لوگ صحت یاب ہوکر اسپتال سے ڈسچارج ہوچکے ہیں۔

چکبالاپور کی اس مہلوک خاتون کے تعلق سے پتہ چلا ہے کہ اسے 24 مئی کو پرائیویٹ اسپتال میں گردوں کی شکایت کی بنا پر داخل کیا گیا تھا، جب حالت میں سدھار آنے کے بجائے حالت بگڑتی چلی گئی تو وہاں سے سیدھے بنگلور اسپتال منتقل کیا گیا، کل 28 مئی کو اس کی رپورٹ کووویڈ۔19 پوزیٹو  موصول ہوئی، اور آج یہ خاتون چل بسی۔

آج جو 248 کورونا کے معاملات سامنے آئے ہیں،  سب سے زیادہ تشویش کی بات یہ ہے کہ ان میں سے صرف 16 ایسے  ہوئے ہیں جو  کوروناسے متاثرہ مریضوں کے رابطے سے آیا ہے۔جبکہ دیگر 232 معاملات دوسری ریاستوں سے کرناٹک میں داخل ہونے والوں کی ہے جس میں سب سے زیادہ کورونا سے متاثرہ لوگ مہاراشٹرا سے لوٹے ہیں۔  دہلی، اندھرا پردیش ، تمل ناڈو اور ائیر لینڈ سے لوٹنے والے لوگوں کا نمبر مہاراشٹرا کے بعد ہے۔ 

آج جتنی بڑی تعداد میں کورونا سے متاثرہ لوگوں کی رپورٹ پوزیٹو آئی ہے، زیادہ تر کیسس اُڈپی، کلبرگی، یادگیر اور رائچور  سے ہے۔