بنگلورو، 30/مئی (ایس او نیوز/ایجنسی) کرناٹک میں نوتشکیل کانگریس حکومت نے ریاست کی ذمہ داری سنبھالتے ہی سرگرمی کے ساتھ عوام کے حق میں کام شروع کر دیا ہے۔ تازہ ترین خبروں کے مطابق کرناٹک کی سابقہ بی جے پی حکومت پر کلیان کرناٹک ریجنل ڈیولپمنٹ بورڈ (کے کے آر ڈی بی) میں گھوٹالے کا الزام لگا ہے۔ اس سلسلے میں کرناٹک حکومت کے وزیر پریانک کھڑگے نے شکایت درج کرائی ہے۔ اس شکایت کو پیش نظر رکھتے ہوئے کانگریس حکومت نے گھوٹالے کی جانچ کا حکم صادر کر دیا ہے۔

کرناٹک کے نائب وزیر اعلیٰ ڈی کے شیوکمار نے کلیان کرناٹک ریجنل ڈیولپمنٹ بورڈ گھوٹالہ معاملے پر اپنا رد عمل ظاہر کرتے ہوئے کہا ہے کہ ’’صرف کلیان کرناٹک ریجنل ڈیولپمنٹ بورڈ ہی نہیں بلکہ ایسے کئی گھوٹالے ہوئے ہیں۔ ہم انصاف کریں گے اور جلد ہی سبھی گھوٹالوں کی جانچ کے احکامات صادر کیے جائیں گے۔‘‘

قابل ذکر ہے کہ کلیان کرناٹک ریجنل ڈیولپمنٹ بورڈ کو پہلے حیدر آباد کرناٹک ریجنل ڈیولپمنٹ بورڈ کے نام سے جانا جاتا تھا۔ اس کی تشکیل 2013 میں کی گئی تھی اور بیدر، بیلاری، کلبرگی، کوپل، رائچور اور یادگیر ضلعوں کے ساتھ ساتھ 40 اسمبلی حلقوں میں ترقی کی ذمہ داری اس بورڈ پر ہے۔

واضح رہے کہ کچھ ماہ قبل سماجی کارکن گروناتھ وَدے نے کے کے آر ڈی بی گھوٹالے کا الزام عائد کرتے ہوئے سی بی آئی جانچ کا مطالبہ کیا تھا۔ وَدّے نے اپنی شکایت میں کہا تھا کہ بورڈ کے ٹنڈر جاری کرنے میں بدعنوانی ہوئی، ساتھ ہی جتنا فنڈ بورڈ کو دیا گیا اتنا خرچ نہیں ہوا۔ بورڈ کے تحت جو کام ہوا اس کا معیار بھی خراب ہے۔ ساتھ ہی فنڈ کی تقسیم میں بھی تفریق کا الزام عائد کیا گیا۔ اتنا ہی نہیں بورڈ کی میٹنگ بلانے میں اصولوں کو نظر انداز کیے جانے اور ترقیاتی کاموں کا آڈٹ نہ ہونے کا الزام بھی عائد کیا گیا ہے۔