بنگلورو شہر کے 10اہم علاقوں میں ٹرافک پر قابو پانے افسروں کو وزیر اعلیٰ بومئی کی ہدایت
بنگلورو،27؍جون (ایس او نیوز) ریاستی وزیر اعلیٰ بسواراج بومئی نے ہدایت دی کہ شہر کے ہیبال، مہادیو پورہ آؤٹر رنگ روڈ، سلک بورڈ جنکشن، سینٹ جانس اسپتال، بھٹرہلی جنکشن، وائٹ فیلڈ روڈ سمیت 10اہم علاقوں میں ٹرافک پر قابو پانے کے ساتھ ٹرافک سگنلوں کا سنکروفائز کیا جائے۔
اپنے سرکاری دفتر کرشنا میں بنگلور کے ٹرافک نظام کے تعلق سے بی بی ایم پی، بنگلور واٹر سپلائی اینڈ سیوریج بورڈ اور شہر کے پولیس افسروں کے ساتھ طلب کردہ ایک اجلاس سے خطاب کرتے ہوئے وزیر اعلیٰ نے افسروں کو یہ ہدایت دی اور کہا کہ ڈپٹی کمشنرز اس کام کی خود نگرانی کریں۔ بڑھتی ہوئی ٹرافک پر قابو پانے محکمہ شہری ترقیات وداخلہ کے اڈیشنل چیف سکریٹری کی قیادت میں بی بی ایم پی چیف کمشنر، پولیس کمشنر، بی ایم آر ایل، بنگلور واٹر سپلائی اینڈ سیوریج بورڈ کے افسر متحدہ طو رپر پروگرام ترتیب دیں۔
اس موقع پر وزیر اعلیٰ نے ڈائرکٹر جنرل آف پولیس پراوین سود کو ہدایت دی کہ ٹرافک پولیس اہلکاروں کی تعداد میں اضافہ کیاجائے اور قومی شاہراہ سے شہر کے اندر داخل ہونے والے اہم راستوں میں ٹرافک کو آسان کیاجائے۔ وزیر اعلیٰ نے ہدایت دی کہ نربھیا اسکیم کے تحت نصب کیمروں میں سے ٹرافک سگنلوں میں ترجیحی بنیاد پر کیمرے نصب کئے جائیں اور آرٹیریل، سب آرٹیریل وہائی ڈینسٹی سڑکوں پر غیر قانونی قبضے اور رکاوٹوں کو ہٹا کر شہر میں بھاری موٹر گاڑیوں پر روک تھام کیلئے اٹھائے گئے اقدامات کی رپورٹ پیش کریں۔
وزیر اعلیٰ نے ہدایت دی کہ سی بی ڈی، ہائی ڈینسٹی کاریڈار میں 48 کروڑ کی لاگت سے سگنلوں کے سنکر وفائزیشن کا کام جلد ہی شروع کیا جائے اور سڑکو ں کے کھڈوں کو ترجیحی بنیاد پر بند کیا جائے۔
اجلاس میں وزیر اعلیٰ کے جنرل سکریٹری این، منجوناتھ، بی بی ایم پی اڈمنسٹریٹر راکیش سنگھ، چیف کمشنر تشار گری ناتھ، سٹی پولیس کمشنر پرتاپ ریڈی، جوائنٹ کمشنر روی کانتے گوڈا ودیگر حاضر رہے۔