کرناٹک میں کورونا کا قہر جاری، ایک ہی دن 1272 نئےمعاملات، ایک ہی دن بنگلورو میں 735 پوزیٹیو، 7لوگوں کی ہوئیں موت
بنگلورو،2؍جولائی (ایس او نیوز) ریاست کرناٹک میں ایک ہی دن کورونا وائرس کی زد میں آکر7 مریضوں کی موت واقع ہوگئی جبکہ 1272 تازہ کووڈ معاملات سامنے آئے۔ ملک کی دیگر ریاستوں کی طرح اب کرناٹک میں بھی کورونا وائرس کا خوفناک پھیلاؤ رکنے اور تھمنے کا نام نہیں لے رہا ہے، ہر گزرتے لمحے اور دن کے ساتھ کورونا وائرس کے نئے معاملات میں اضافہ دیکھا جارہا ہے، کرناٹک میں ان لاک۔2 میں غیر معمولی نرمی کی وجہ سے 24 گھنٹوں کے دوران کورونا متاثرین کی تعداد میں تشویشناک حد تک اضافہ دیکھا جارہا ہے۔
ریاستی محکمہ صحت کی جانب سے جاری ہیلتھ بلیٹن کے مطابق بروز منگل شام 5 بجے سے بروز چہارشنبہ شام 5 بجے تک 1272 نئے کورونا کیس سامنے آئے، اس کے ساتھ ہی ریاست میں کورونا سے متاثر ہونے والوں کی تعداد بڑھ کر 16514 ہوگئی۔ راجدھانی بنگلورو میں ایک ہی دن 735 معاملات پیش آئے، جملہ تعداد 5290 ہوگئی ہے، اتنی بڑی تعداد کے ساتھ ہی بنگلورو اب کورونا سے محفوظ شہروں کے زمرے سے باہر ہو کر نہایت خطرناک زون میں داخل ہوگیا ہے۔
جن اضلاع میں کورونا وائرس کے پوزیٹیو معاملے سامنے آئے ان کی تفصیل اس طرح ہے۔ بنگلورو میں 735 ، بیلاری میں 85، دکشن کنڑا میں 84، دھارواڑ میں 35، بنگلورودیہی ضلع میں 29، پوزیٹیو کیس پائے گئے۔ اس کے علاوہ ہاسن میں 28، اُتر کنڑا میں 23، اُڈپی میں 22، چامراج نگر میں 21، باگل کوٹ میں 20، کلبرگی میں 14، رائچور میں 12، چترادرگہ میں 12، شیموگہ میں 3، بیدر اور بیلگاوی میں 8،8، کوڈگو میں 7 اور چکمگلورو میں ایک کیس سمیت ریاست بھر میں 1272 کوروناکے تازہ معاملات پیش آئے ہیں۔ جس سے اب تک کی کورونا متاثرین کی تعداد بڑھ کر 16514 ہوگئی ہے۔
ریاست بھر میں جملہ 7 افراد کورونا سے فوت ہوگئے ہیں، ریاست میں کورونا وائرس سے علاج کے دوران اب تک مرنے والوں کی تعداد 253 ہوگئی ہے، جبکہ کورونا وائرس سے اب تک 8063 افراد صحت یاب ہوئے ہیں جنہیں اسپتالوں سے ڈسچارج بھی کردیا گیا ہے۔ ریاست میں کورونا وائرس کے فعال کیسوں کی تعداد 8194 ہے جبکہ 292 افراد انتہائی نگہداشت وارڈ (آئی سی یو) میں زیر علاج ہیں۔