دہلی میں احتجاج کرنے والے کسان نہیں دہشت گردہیں، وزیرزراعت بی سی پاٹل کے متنازع بیان سے ناراضی کی لہر
بنگلورو،27؍جنوری(ایس او نیوز) راجدھانی دہلی میں احتجاج کرنے والے کسان نہیں بلکہ دہشت گردہیں۔دہلی میں ہورہااحتجاج دہشت گردوں کی بھیانک کرتوت ہے۔اس قسم کا سخت اورمتنازع بیان ریاستی وزیربرائے زراعت بی سی پاٹل نے دیاہے۔
کوپل میں اخباری نمائندوں سے بات چیت کے دوران انہوں نے کہاکہ دہلی میں احتجاج کرنے والے دہشت گردہیں،ان تمام کودوسرے ممالک کی تائیدحاصل ہے۔کانگریس کی تائیدبھی ان دہشت گردوں کوحاصل ہے۔انہوں نے مزیدکہاکہ کسانوں نے کبھی بھی قانون کواپنے ہاتھوں میں نہیں لیا،تاریخ میں ایسی کوئی مثال نہیں ملتی۔ان تمام احتجاجیوں کوپاکستان سے کمک مل رہی ہے۔لال قلع کے قریب جاکروہ اتناہنگامہ کرسکتے ہیں؟ اس پرسوچناپڑتاہے۔
انہوں نے کہاکہ وزیراعظم نریندرمودی کی مقبولیت سے خارکھائے ہوئے ہیں۔مودی حکومت کوہلانایادہلاناممکن نہیں ہے،اس لئے دہشت گردوں کو لاکر کسانوں کے نام سے احتجاج کروایا جارہا ہے۔ان کوپاکستان اورکانگریس کی مکمل تائیدحاصل ہے۔اس کی ہم مذمت کرتے ہیں۔ انہوں نے کہا کہ لال قلع کی اپنے ایک تاریخ اور اپنا وقار ہے۔ایک کسان بطوروزیراعظم لال قلع میں قومی پرچم لہرائے،اس پرہماراکوئی اعتراض نہیں ہے،لیکن کسان کے نام سے وہاں جاکرقومی پرچم کی بجائے کوئی اورجھنڈالہرایاجاتاہے تویہ سوال پیداہوتاہے کہ احتجاج کرنے والے کون ہیں؟ اس سے صاف ظاہرہے کہ وہ دہشت گردہیں۔