بنگلورو، 22/ مئی (ایس او نیوز /ایجنسی) تعلیمی  سال برائے 24-2023 کے پی یوسی سال دوم کے دوسرے مرحلہ کے امتحان کا نتیجہ شائع ہو گیا ہے ، صرف 35.25 فیصد  طلبا ء  ہی امتحان پاس کر پائے ہیں۔ ہمیشہ کی طرح اس بار بھی طالبات نے پی یوسی سال دوم کے امتحان کے دوسرے مرحلہ میں ممتاز نمبرات سے ٹاپ کیا ہے۔

پی  یوسی سال دوم کے امتحانات ریاست کے جملہ 301 مراکز میں 29 اپریل سے 16 مئی تک منعقد ہوئے ۔ 15 مئی سے 18 مئی تک 7875 ممتحن حضرات نے 28 مراکز میں جوابی پرچوں کی جانچ کی اور منگل کو نتائج کا اعلان کیا گیا ہے۔

شعبہ آرٹس میں 22.24 فیصد، کامرس شعبہ میں 22.06 فیصد اور سائنس شعبہ میں 55.16 فیصد طلبہ پاس ہوئے ہیں ۔ امتحان کے لیے 1,49,824 طلبہ نے رجسٹریشن کرایا تھا۔ جن میں سے 1,48,942 طلبہ نے امتحان لکھا، اس میں سے صرف 52,505 طلبہ پاس ہوئے اور مجموعی نتیجہ 35.25 فیصد رہا۔ امتحان میں شرکت کرنے والے 84,632 لڑکوں میں سے 26,496 پاس ہوئے اور نتیجہ 31.31 فیصد رہا۔ 64,310 طالبات میں سے 26,009 طالبات پی یوسی سال دوم - 2 میں کامیاب ہوئی ہیں۔ طالبات کا مجموعی نتیجہ 40.44 فیصد رہا۔

جوابی پرچہ کی اسکین شدہ کاپی کے لیے درخواست دینے کا 23 مئی آخری دن ہے اور جن لوگوں  نے  فیس ادا کی ہے وہ 22 سے 24 مئی تک جوابی شیٹ کی کاپیاں ڈاؤن لوڈ کر سکتے ہیں۔ اسکین کاپی حاصل کرنے کے لیے 530 روپے فیس طے ہے، اور جوابی پرچوں کی دوبارہ جانچ کے لیے ہر مضمون پر 1670 روپے فیس مقرر کی گئی ہے۔

سیکنڈ پی یوسی امتحان - 3 کے لیے 23 سے 28 مئی تک رجسٹریشن کی گنجائش دی گئی ہے اور 29 مئی سے 30 مئی تک جرمانے کے ساتھ فیس کی ادائیگی کی گنجائش ہے۔ دوبارہ جانچ کے نتائج کا انتظار کیے بغیر امتحان ۔ 3 کے لیے درخواست دی جاسکتی ہے۔

سکینڈ پی یو سی امتحان - 3 کا نظام الاوقات شائع کیا گیا ہے ۔ امتحانات 24 جون سے 5 جولائی تک منعقد ہوں گے۔ ٹائم ٹیبل اس طرح ہے، 24 جون کو کنڑا، عربی ۔ 25 جون کو انگریزی، 26 جون کو سوشیالوجی، بیالوجی، جیالوجی ، الیکٹرانکس ، کمپیوٹر سائنس ۔ 27 جون کو اختیاری کنڑ ا اور اکاؤنٹس کا امتحان ہوگا ۔ 28 جون کو کیمسٹری، اکنامکس، 29 جون کو تاریخ، فزکس، یکم جون کو ہوم سائنس، پولیٹیکل سائنس، نیو مر لوجی ، 2 جون کو لاجک، بزنس اسٹڈیز، ریاضی ، 3 جون کو جغرافیہ، نفسیات، الجبرا، 4 جون کو ہندی، 5 جون کو تمل، تیلگو، ملیالم،مراٹھی، اردو، سکرت ، فرانسیسی کے امتحانات ہوں گے۔