کوچین:14جون (ایس او نیوز) کویت کی عمارت میں لگی آگ سے گذشتہ روز جن 40 سے زائد ہندوستانی ورکروں کی موت ہوئی تھیں، ان کی نعشوں کو ہندوستان لانےکی تیاریاں کی جارہی ہیں، چونکہ مرنے والوں کی بڑی تعداد ریاست کیرالہ سے ہے، کیرالہ کے کوچین انٹرنیشنل ائیر پورٹ پر سہولیات فراہم کی جارہی ہیں۔ 

واضح رہے کہ کویت میں گزشتہ دنوں ایک عمارت میں آتشزدگی سے 45 ہندوستانیوں سمیت 49 افراد کی موت واقع ہوگئی تھی۔آج جمعہ کو ہندوستانی فضائیہ کا ایک طیارہ ہلاک شدگان کی باقیات کو ملک واپس لانے کویت جارہاہے، پتہ چلا ہے کہ مہلوکین کی شناخت مشکل ہے جس کی وجہ سے ان کا ڈی این اے کے ذریعے پتہ لگایا جائے گا اور نعشوں کو لواحقین کے حوالے کیا جائے گا ۔ بتایا گیا ہے کہ مرنے والوں میں سے 23 کا تعلق کیرالہ سے ہے۔

ذرائع کے مطابق کوچین بین الاقوامی ہوائی اڈے پر ایمبولینس اور پولیس فورس کو تعینات کیا گیا ہے۔ کوچین کے بعد پرواز وہاں سے دہلی کے لیے روانہ ہوگی۔افسران کا کہنا ہے کہ کویت کی عمارت میں آتشزدگی کے شکار افراد کی نعشوں کووصول کرنے کے لیے کوچین بین الاقوامی ہوائی اڈے پر تیاریاں جاری ہیں۔ ایمبولینسیں ہر ایک کی لاش کو متعلقہ لوگوں کے آبائی مقام لے جانے کے لیے تیار ہیں، جن میں تمل ناڈو اور کرناٹک کے لوگ بھی شامل ہیں۔ وزیر اعلیٰ پنارائی وجین کے ساتھ وزراء کے راجن، پی راجیو اور وینا جارج ہوائی اڈے پر ان کو تعزیت پیش کرنے کے لئے ایرپورٹ پر موجود رہیں گے۔

ائیرپورٹ پر وزراء اور دیگر افراد کو خراج عقیدت پیش کرنے کے لیے خصوصی پوڈیم کا بھی انتظام کیا گیا ہے۔

یاد رہے کہ کویت کی رہائشی عمارت میں آگ لگنے کی واردات بدھ 12جون کو صبح 4:30 بجے پیش آئی تھی، جس کی تفتیش جاری ہے، کویت حکومت کے ایک اہل کار نے بتایا عمارت کے مالک سمیت بعض ملزمین کو گرفتار کرلیاگیا ہے۔ بتاتے چلیں کہ کیرالہ حکومت مہلوکین کے ورثاء کو 5-5لاکھ روپے اور زخمیوں کے لواحقین کو ایک ایک لاکھ روپے کی مدد دینے کا اعلان کر چکی ہے۔