راہل گاندھی کے لئے اکٹھا کی گئی رقم آئی ٹی افسروں نے ضبط کی ہے: یڈ یورپا
بنگلورو،16؍مارچ (ایس او نیوز) کانگریس کے سینئر قائد ملیکارجن کھرگے کو مخلوط حکومت کی تشکیل کے موقع پر وزیراعلیٰ بنانے کا فیصلہ کیا جاناتھا، جس وقت فیصلہ کرناتھا ، فیصلہ نہیں کیاگیا اور اب یہ معاملہ اچھالا جارہا ہے۔ جس سے صاف ظاہر ہوتا ہے کہ جے ڈی ایس کے سربراہ ایچ ڈی دیوے گوڑا درج فہرست ذات وقبائل (ایس سی ایس ٹی) کے ووٹ بٹورنے کے لئے کھرگے کو وزیراعلیٰ نہ بنائے جانے کا مسئلہ اٹھارہے ہیں اس قسم کی تنقید بی جے پی کے ریاستی صدر بی ایس یڈ یورپا نے کی۔
نامہ نگاروں کے ساتھ بات چیت کرتے ہوئے ایڈی یورپا نے کہاکہ کانگریس کے قومی صدر راہل گاندھی اور سونیا گاندھی ، ملیکارجن کھرگے کو وزیراعلیٰ بنائے جانے پر راضی نہیں ہوئے۔ دیوے گوڑا کو اب یہ بات کہنے کی ضرورت کیوں پیش آئی۔ اگر وہ چاہتے ایس سی ایس ٹی طبقات سے حقیقی ہمدردی ہوتی تو یہ بات 9؍مہینے پہلے بتاسکتے تھے۔ اتنے دن خاموش رہ کر لوک سبھا انتخابات کے موقع پر ایس سی ایس ٹی طبقات کے ووٹ حاصل کرنے کے لئے دیوے گوڑا مگرمچھ کے آنسو بہارہے ہیں۔ سیٹوں کی تقسیم کے معاملہ میں جے ڈی ایس کو سبکی اٹھانی پڑی ہے جس پردیوے گوڑا نے اس قسم کا بیان دیا ہے۔ یہ عوام کو دھوکہ دینے والا بیان ہے۔ یہ ایک ڈرامہ باز بیان ہے۔ اس بیان سے عوام کا کوئی فائدہ ہونے والا نہیں ہے ۔ اس قسم کا ناٹک کرنا دیوے گوڑا کے لئے عام بات ہے۔ ناٹک کرنے والے دیوے گوڑا کو عوام نہیں مانتے ہیں۔انکم ٹیکس (آئی ٹی) افسروں کی چھاپہ مار کارروائی پر ردعمل ظاہر کرتے ہوئے ایڈی یورپا نے کہاکہ راہل گاندھی کی انتخابی مہم وتشہیری سرگرمیوں کے لئے دہلی کو منتقل کرنے کی غرض سے جمع کردہ رقم ضبط کی گئی ہے۔ اس ضبطی سے صاف معلوم ہورہا ہے کہ موجودہ حکومت 20؍پرسنٹ کمیشن سرکار ہے۔ اس معاملہ پر سدارامیا کیوں خاموش ہیں، وہ کیا بیان دیں گے؟ محکمہ دیہی ترقیات کے انجینئر کا بنگلور لارڈج میں ٹھہرنا اور کروڑوں روپئے کی رقم گتہ داروں سے اکٹھاکرنا اس بات کا صاف ثبوت ہے کہ یہ کمیشن والی حکومت ہے۔ ایسے افسروں کو کیا کوئی شرم وحیا ہے یا نہیں۔ افسروں کی جانب سے رقم اکٹھا کرنا انتہائی مجرمانہ کام ہے۔
ریاستی وزیر برائے دیہی ترقیات وپنچایت راج کرشنا بائرے گوڑا ،وزیراعلیٰ کمار سوامی ، سابق وزیراعلیٰ سدارامیا اس کے راست ذمہ دار ہیں۔ مبہم جواب دینے کی بجائے کرشنا بائرے گوڑا کو چاہئے کہ وہ واضح اور صاف جواب دیں۔ اس معاملہ میں ملوث خاطی افسروں کے خلاف سخت کارروائی کی جائے۔ اس موقع پر ایڈی یورپا نے کہاکہ منڈیا میں بی جے پی امیدوار کا معاملہ ابھی حتمی مرحلہ تک نہیں گیا۔ سمالتا کی ایس ایم کرشنا سے ملاقات کی جانکاری ملی ہے۔ ان کا فیصلہ سنائے جانے کے بعد ہم اپنا فیصلہ سنائیں گے۔ اس طرح ہاسن میں بھی بی جے پی کا امیدوار طے نہیں کیاگیا۔ اے منجو کو میدان میں اتارنے کا فیصلہ ابھی نہیں ہوا۔ ایڈی یورپا نے کہاکہ چامراج نگر میں سرینواس پرساد کا انتخاب لڑنا تقریباً پکا ہوگیا ہے۔