نئی دہلی، 24/ مارچ (ایس او نیوز /ایجنسی) دہلی کے وزیر اعلی اور عام آدمی پارٹی (اے اے پی) کے کنوینر اروند کیجریوال کی حمایت میں سنیچر کوعام آدمی پارٹی(آپ) نے انڈیا اتحاد کی  جماعتوں کے ساتھ یہاں شہیدی پارک میں مظاہرہ کرتے ہوئے ملک کی جمہوریت کو بچانے اور آمرانہ حکومت سے آزادی دلانے کا عزم کیا۔

 پنجاب کے وزیر اعلیٰ بھگونت مان نے کہا کہ بھگت سنگھ نے۲۳؍ سال کی عمر میں ملک کی آزادی کے لیے قربانی دی تھی۔ ہم آج یہاں ان کو سلامی دینے کے لئے آئے ہیں۔ بھگت سنگھ ملک میں جمہوریت لانے کیلئے شہید ہوئے تھے۔ بھگت سنگھ، سکھ دیو، راج گرو، چندر شیکھر آزاد اور لالہ لاجپت رائے نے انگریزوں سے کہا تھا کہ یہ ملک چھوڑ دو، ہم ووٹ دے کر اپنے لیڈر خود منتخب کریں گے۔۱۹۴۷ء  میں جب ملک آزاد ہوا تو ہمیں ووٹ کا حق ملا اور ملک کے لیے لیڈروں کا انتخاب شروع کر دیا، لیکن آج بھگت سنگھ، راج گرو اور سکھ دیو کی روحیں تڑپ رہی ہوں گی کہ جس آزادی کیلئے قربانیاں دی تھیں، اس ملک میں اب جمہوریت باقی نہیں ہے۔

 آپ کی سینئر لیڈر اور وزیر آتشی نے کہا کہ یہ لوگ ہمیں ایک ایک کرکے جیل میں ڈالنا چاہتے ہیں۔ یہ لوگ چاہتے ہیں کہ ہم الیکشن نہ لڑ سکیں۔ ہم الیکشن کمیشن سے وقت مانگیں گے اور جن پولیس اہلکاروں نے پارٹی آفس سیل کیا ہے، ان کی شکایت کریں گے۔ انہوں نے کارکنوں سے کہا کہ آپ لوگ اپنے اپنے علاقوں میں جا کر الیکشن کی تیاری کریں۔اس دوران کیرالا کے ترواننت پورم میں بھی عام آدمی پارٹی نے احتجاج کیا جس میں کانگریس لیڈر ششی تھروربھی شامل ہوئے ۔