بنگلورو19/جولائی (ایس اونیوز) حلال کمائی کے نام پر بھاری منافع کا لالچ دے کرہزاروں لوگوں سے کروڑوں روپے سرمایہ کاری میں لگوانے کے بعد اچانک فرار ہوجانے والے آئی ایم اے کے سرغنہ منصور خان کوپولیس کی خصوصی تحقیقاتی ٹیم (ایس آئی ٹی)نے نئی دہلی کے ایئر پورٹ پر رات 1.30بجے گرفتار کرلیا، پھر چھان بین کے لئے  انفورسمنٹ ڈائریکٹوریٹ  کے حوالے کردیا ۔

 منصور علی خان اپنے سرمایہ کاروں کو دھوکہ دینے کے بعد فرار ہوکر دبئی پہنچ گیا تھا۔اس کے اچانک لاپتہ ہونے کے بعد ہزاروں افراد نے بنگلورو کمرشیل پولیس اسٹیشن میں شکایتیں درج کروائی تھیں۔  دھوکہ دہی کے اس معاملے میں زندگی بھر کی کمائی اور پونجی گنوانے والے افراد کو راحت پہنچانے کے لئے ریاستی حکومت نے ایک خصوصی تحقیقاتی ٹیم بنانے کے احکام جاری کیے تھے۔اس گھوٹالے کے منظر عام پر آنے کے بعد کئی علماء اور سیاست دانوں کے نام بھی عوام میں گردش کرنے لگے تھے۔ جبکہ ایس آئی ٹی نے گذشتہ روز ریاست کے ایک معروف عالم دین کو گرفتار کرنے کی خبر بھی موصول ہوئی تھی۔ جبکہ سینئر سیاستداں روشن بیگ کو تحویل میں لے کر تفتیش کے بعد چھوڑ دیا گیا ہے۔ 

 ایس آئی ٹی کے افسر نے بتایا کہ گرفتاری کے بعد پوچھ تاچھ کے لئے منصور خان کو انفورسمنٹ ڈائریکٹوریٹ کے افسران نے اپنی تحویل میں لیا ہے۔  خیال رہے کہ دوتین دن قبل منصورخان نے ویڈیو مسیج کے ذریعے بتایا تھا کہ اگر پولیس اسے تحفظ کی ضمانت دے گی تو وہ 24گھنٹے کے اندر ہندوستان لوٹ آئے گا۔ سمجھا جارہا ہے کہ اسی پیغام کی بنیاد پر ایس آئی ٹی نے اسے ضروری تحفظ فراہم کرنے کا بھروسہ دلاکر واپس لوٹ آنے اور اپنے آپ کو قانون کے حوالے کرنے پر آمادہ کرلیا۔