بنگلورو،15/جولائی (ایس او نیوز/پریس ریلیز) سوشیل ڈیموکریٹک پارٹی آف انڈیا (SDPI)کے ریاستی صدر الیاس محمد تمبے نے اپنے جاری کردہ اخباری اعلامیہ میں کرناٹک میں ہورہے شرمناک سیاست کی سخت مذمت کرتے ہوئے کہاہے کہ جے ڈی ایس۔ کانگریس کی مخلوط حکومت اپنی حکومت بچانے کی کوشش کررہی ہے اور ریاست کے گورننس کو مکمل طور پر نظر انداز کررہی ہے۔ان پارٹیوں کے اراکین اسمبلی اپنے مفاداور منسٹر پوسٹس کیلئے حکومت کو بلیک میل کررہے ہیں اور ریاستی حکومت ان کو قابو میں رکھنے کی بے کارکوشش میں لگی ہوئی ہے۔ الیاس محمد تمبے نے اس بات کی طرف خصوصی نشاندہی کرتے ہوئے کہا ہے کہ اراکین اسمبلی جن کو ووٹرس نے منتخب کیا ہے وہ ان کو دھوکہ دے رہے ہیں اور بی جے پی کے جھانسے میں آکر ریسارٹس میں چھپے ہوئے ہیں۔ ریاستی حکومت کو ایسے کسانوں کے بارے میں سوچنے کا وقت ہی نہیں ہے جو ریاست میں سخت خشک سالی کی وجہ سے پریشان ہیں اور ریاست میں انتظامیہ بالکل ٹھپ ہوچکی ہے۔ سیکولر پارٹیوں سے تعلق رکھنے کا دعوی کرنے والے ان اراکین اسمبلی کی کوئی گیارنٹی نہیں ہے کیونکہ وہ کسی بھی وقت بی جے پی میں شامل ہوسکتے ہیں۔ الیاس محمد تمبے نے کہا ہے کہ ریاست کرناٹک کے ووٹرس کو چاہئے کہ وہ ایسے اراکین اسمبلی کو تلخ سبق سکھائیں جو اپنے ذاتی مفاد کیلئے عوام کے فلاح و بہبود کو نظر انداز کررہے ہیں۔ ریاست کی حکومت کو گرانے میں لگی بی جے پی کی سخت مذمت کرتے ہوئے الیاس محمد تمبے نے کہا ہے کہ بی جے پی ہارس ٹریڈنگ اور ریسارٹ بلیک میلنگ وغیرہ سے جمہوریت کی بنیاد کو کھوکھلا کررہی ہے۔ بی جے پی اپنی ایسی گندی سیاست سے کرناٹک کے عوام کو ہمیشہ دھوکہ نہیں دے سکتی ہے۔ریاست میں اس سے قبل کی بی جے پی سرکار بڑے پیمانے کی بدعنوانیوں، طاقت کا غلط استعمال اور جنسی اسکینڈل کیلئے خبروں میں رہی ہے۔ اب یہی بی جے پی غیر قانونی طریقے سے اقتدار پر قبضہ کرنے کی کوشش کررہی ہے جو کہ ناقابل معافی ہے۔ایس ڈی پی آئی ریاستی صدر الیاس محمد تمبے نے ریاست کرناٹک کے عوام سے اپیل کرتے ہوئے کہا ہے کہ وہ متحد ہوکر ان تینوں پارٹیوں کو انتخابات میں سبق سکھائیں تاکہ جمہوریت کو بچایا جاسکے اور ریاست ترقی کی راہ پر گامزن ہوسکے۔