علاقہ حیدر آباد کرناٹک میں ایک ہفتہ بعد بارش میں کمی لیکن 24 گھنٹے آسمان ابر آلود
گلبرگہ ،16؍جولائی(ایس او نیوز؍راست) تقریبا ایک ہفتہ کی مسلسل بارش کے بعد اب جمعرات کے دن سے علاقہ حیدر آباد کرناٹک کے اضلاع گلبرگہ، بیدر، رائچور، یادگیر بلاریوغیرہ میں بارش تھم گئی ہے لیکن آسمان ابھی بادلوں سے گھرے ہوئے ہیں۔ ضلع بیدر میں کارنجی بی اور نارائین پور کے دیہاتوں کے دو مدارس منہدم ہوگئے اور اسی طرح نیلاگی گاؤں اور بھالکی میں ڈگری کالجوں کی عمارتیں کمزور ہوچکی ہیں اور ان کے کسی وقت بھی منہدم ہونے کے خدشات ظاہر کئے گئے ہیں۔ڈپٹی کمشنر گوندا ریڈی نے عہدہ داران کو ہدایت دی ہے کہ ان خراب حالت والی عمارتوں میں کلاسیس منعقد نہ کریں۔کیوں کہ متواتر بارش سے عمارتیں کسی وقت بھی منہدم ہوسکتی ہیں۔ادھر اوراد میں جمعرات کے دن 21اور بسواکلیان میں 5مکانات جذوی طور پر منہدم ہوگئے ہیں۔ اسی طرح بسوا کلیان میں 85مکانات، بھالکی تعلقہ میں 27مکانات، چٹگوپہ میں 20مکانات،ہمنا آباد تعلقہ میں 17کملا نگر میں 14اور ہلسور میں دو مکانات جزوی طور پرمنہدم ہوئے ہیں۔اس طرح ضلع بیدر میں جملہ 286مکانات جزوی طور پر منہدم ہوگئے ہیں۔ بیدر تعلقہ کی جنوارا گاؤں والی مانجرا ندی پر آب ہوچکی ہے۔