کینسر مرض کیلئے کم داموں میں ادویات فراہم کی جائیں گی: بسوا راج بومئی
بنگلورو، 25؍اگست (ایس او نیوز) ریاستی وزیر اعلیٰ بسوا راج بومئی نے بتایاکہ کینسر مریضوں کو ادویات کی خریدی کافی مہنگی ہونے کی وجہ سے قدوائی سمیت تمام شاخوں میں بے حد کم داموں میں ادویات فراہم کرنے ٹرسٹ قائم کیا جائے گا۔
قدوائی انسٹی ٹیوٹ آف انکولوجی میں انفوسس پرتشٹھان کی جانب سے تعمیر اوپی ڈی بلاک اور کینسر علاج کے مختلف سہولتوں کا افتتاح کرتے ہوئے بومئی نے اس خیال کا اظہارکیا انہوں نے بتایاکہ علاقائی سطح پر کینسر اسپتالوں کی ضرورت کو مد نظر رکھتے ہوئے ہبلی اور دھارواڑ میں بھی کینسر اسپتال شروع کرنے کی تیاری کی جارہی ہے۔ انہوں نے صلاح دی کہ قدوائی اسپتال دنیا بھر کے بہترین طبی اداروں کے ساتھ ریسرچ اور ترقی میں حصہ لے اور کینسر مریضوں کو فائدہ پہنچائے۔
ریاستی وزیر برائے صحت و طبی تعلیم ڈاکٹر کے سدھاکر نے خطاب کرتے ہوئے کہاکہ قدوائی اسپتال میں سالانہ ساڑھے چار لاکھ سے زیادہ افراد کا علاج کیا جارہا ہے اور کووڈ کی ممکنہ تیسری لہر کے پیش نظر پیڈیا ٹرکی آئی سی یو یونٹ بھی قائم کیاگیا ہے۔ انہوں نے کہاکہ دور دراز مقامات سے کینسر مریض کو بنگلور آکر قدوائی میں علاج حاصل کرنے میں دقت محسوس ہوگی۔ اس لئے علاقائی مراکز کو قائم کیا جائے گا۔
انہوں نے بتایاکہ 750پرائمری ہیلتھ یونٹس کو ترقی دی گئی ہے۔ انفوسس فاونڈیشن کی صدر سدھامورتی نے خطاب کرتے ہوئے کہاکہ مناسب علاج اور طبی سہولتوں کی قلت کے پیش نظر مریضوں اور ان کے اہل خانہ کو مشکلات کا سامنا کرنا پڑتا ہے۔ ایسے موقع پر عوام کو وقت پر طبی سہولت فراہم کرنے فاؤنڈیشن نے کوشش کی ہے۔
انہوں نے بتایاکہ قدوائی اسپتال کے احاطہ میں انفوسس کے کارپوریٹ سماجی فنڈ سے 75ہزار اسکوائر فیٹ پر او پی ڈی بلاک تعمیر کیاگیا ہے۔ قدوائی اسپتال کے ڈائرکٹر ڈاکٹر رامچندرا نے کہاکہ قدوائی اسپتال ملک میں سرفہرست ہے یہاں کا طبی نظام دنیا میں کہیں نہیں ہے۔ انفوسس کی جانب سے70کروڑ سے زیادہ کا عطیہ دیاگیا ہے۔