بنگلورو،6؍اپریل(ایس او نیوز) وزیر اعلیٰ ایچ ڈی کمار سوامی نے آج ریاستی کانگریس پر زبردست حملہ کرتے ہوئے کہا ہے کہ منڈیا لوک سبھا حلقے میں ان کے فرزند نکھل کمار سوامی کو ہرانے کے لئے کانگریس اور بی جے پی نے ہاتھ ملالیا ہے۔

اخباری نمائندوں سے بات چیت کرتے ہوئے وزیراعلیٰ نے کہاکہ سمالتا منڈیا میں برائے نام آزاد امیدوار ہیں۔ ان کی حمایت کے لئے بجز جے ڈی ایس تمام سیاسی پارٹیاں ایک ہوگئی ہیں، بی جے پی ، کانگریس ، رعیت سنگھا، وغیرہ نے متحد ہوکر نکھل کو ہرانے کی سازش رچی ہے، انہوں نے کہاکہ کانگریس نے ایک طرف جے ڈی ایس سے اتحاد کیا اور نکھل کمار سوامی کو اتحادی امیدوار کے طور پر میدان میں اتارنے کے لئے اپنی تائید کا اعلان کیا تو دوسری طرف اس پارٹی کے بیشتر ضلعی قائدین کھل کر سمالتا کے حق میں کام کررہے ہیں۔

انہوں نے کہاکہ منڈیا پارلیمانی حلقے میں اگر نکھل کمار سوامی کے حق میں فیصلہ نہیں ہوا تو 23 مئی کے بعد ان کے تیور کیا ہوں گے اس کا اندازہ کسی کو نہیں ہوگا۔ انہوں نے کہاکہ پچھلے تین ماہ سے ضلع میں جے ڈی ایس کو ہرانے کے لئے سازش رچی جارہی ہے لیکن مقامی عوام میں جے ڈی ایس کی مقبولیت کو یہ سازش متاثر نہیں کرپارہی ہیں۔ انہوں نے کہاکہ ضلع کی ترقی کے لئے اور کسانوں کی مدد کے لئے جے ڈی ایس نے کیا کیا ہے اس سے منڈیا ضلع کے عوام بخوبی واقف ہیں۔ انہیں یقین ہے کہ منڈیا کے عوام نکھل کا ہاتھ نہیں چھوڑیں گے۔

دوسری طرف کل منڈیا ضلع کے کے آر پیٹ میں سابق وزیراعلیٰ سدرامیا کے ہمراہ نکھل کمار سوامی کے حق میں انتخابی مہم چلاتے ہوئے سابق وزیر اعظم نے اس حلقے میں کانگریس کے عدم تعاون پر افسوس ظاہر کیا اور کہاکہ ایسا لگتا ہے کہ اب حالات قابو سے باہر ہوگئے ہیں، سدرامیا کاآنا بھی شاید یہاں کام نہ آسکے۔ اس کے دوسرے دن ہی آج وزیراعلیٰ ایچ ڈی کمارسوامی نے کانگریس پر نکھل کمار سوامی کو ہرانے کی سازش رچانے کا الزام لگایا تو دوسری طرف میسور میں کانگریس امیدوار وجئے شنکر کی انتخابی مہم کے سلسلے میں جے ڈی ایس کارکنوں کی طرف سے کی گئی میٹنگ کے دوران بھی کانگریس اور جے ڈی ایس کے درمیان اعتماد کی کمی پر افسوس ظاہر کیا اور کہاکہ اس سے دونوں پارٹیوں کو نقصان پہنچ سکتا ہے۔