بنگلورو،21؍جون(ایس او نیوز) ڈاکٹروں پرحملہ اور ان کے خلاف زیادتی کے معاملات سے متعلق قوانین کے نفاذ کیلئے سخت اقدامات کئے جارہے ہیں۔ یہ بات وزیر اعلیٰ کمار سوامی نے کہی۔ شہر کے قدوائی اسپتال میں انفوسیس فاؤنڈیشن کی جانب سے تعمیر کردہ آپریشن تھیٹر کا افتتاح کرنے کے بعد خطاب کرتے ہوئے انہوں نے کہا کہ ڈاکٹروں پر حملے کے واقعات قابل مذمت ہیں۔ ایسے واقعات پر روک لگانے کی ضرورت ہے۔ انہوں نے کہا کہ ایسی وارداتیں پہلے بھی ہوچکی ہیں۔ ان پر قابو پانے کیلئے سال2006ء میں ریاست کرناٹک میں قانون بنایاگیا تھا۔ جس کے تحت قصور وار وں کو 3سال سزائے قید کی گنجائش ہے۔ اس قانون کے تحت ڈاکٹروں پر حملہ غیر ضمانتی قرار دیا گیا ہے۔ اس قانون کو سختی سے نافذ کیا جائے گا اور ضرورت پڑنے پر قانون کو ترمیم کے ذریعہ مزید سخت بنایا جائے گا۔ انہوں نے کہا کہ ریاستی حکومت ڈاکٹروں کو تحفظ فراہم کرنے کی پابند ہے۔ تعلیم اور صحت عوامی خدمت کے شعبے میں ان شعبوں کیلئے عوامی تعاون بہت اہم ہے۔ اس سلسلے میں رضا کارانہ تنظیموں اور مخیر اداروں کا تعاون بھی بہت اہم ہے۔ انفوسیس کی طرف سے آپریشن تھیٹر کی تعمیر قابل ستائش ہے۔