گودھرا سانحہ: 27 قصورواروں کی عرضی پر گجرات سرکار کو عدالت عظمیٰ کا نوٹس
نئی دہلی ، یکم فروری (ایس او نیوز؍ایجنسی)سپریم کورٹ نے 2002 میں گودھرا اسٹیشن پر سابرمتی ایکسپریس ٹرین کو جلائے جانے کے واقعے میں جیل میں قید 27 قصورواروں کی ضمانت کی درخواستوں پر پیر کے روز گجرات حکومت کو نوٹس جاری کیا ہے۔جسٹس ڈی وائی چندر چوڑ کی سربراہی والی بنچ نے 27 فروری 2002 کو پیش آنے والے اندوہناک معاملے میں درخواست گزاروں اور ریاستی حکومت کے دلائل سننے کے بعد گجرات حکومت کو ہدایت دی کہ وہ قصورواروں کی ضمانت کی درخواستوں پر تفصیلی جواب داخل کرے۔عدالت عظمیٰ نے گزشتہ سال دسمبر میں اس واقعے کے قصوروار فاروق کی ضمانت منظور کی تھی۔
‘عدالت نے فاروق کی گزشتہ 17 سال سے قید کو ضمانت کے لیے بنیاد سمجھا تھا۔ عدالت عظمیٰ کے اس فیصلے کو بنیاد بناتے ہوئے دیگر 27 قصورواروں نے ضمانت کی امید میں عدالت عظمیٰ سے رجوع کیا ہے۔ان میں سے کچھ کو عمر قید اور دیگر کو عدالت سزائے موت سنائی گئی تھی۔ کئی مجرموں کی سزائے موت کو عمر قید میں تبدیل کرنے کے ہائی کورٹ کے فیصلے کے خلاف دائر درخواستیں عدالت عظمیٰ میں زیر التوا ہیں۔ سابرمتی ایکسپریس کی S-6 کوچ میں آگ لگنے کے واقعے میں بچوں اور خواتین سمیت 59 افراد کی موت ہو گئی تھی۔ اس واقعے کے بعد گجرات میں ہونے والے فسادات میں بڑی تعداد میں لوگوں کا قتل ہوا تھا۔