میئر گنگامبیکے ملیکارجن کی وزیر اعلیٰ کمار سوامی سے ملاقات، بی بی ایم پی کے گرانٹ میں اضافے کا مطالبہ
بنگلورو،7/مئی(ایس او نیوز) ریاستی اعلیٰ ایچ ڈی کمار سوامی سے آج شہر کی میئر گنگامبیکے ملیکارجن نے ملاقات کی اور ان سے گزارش کی کہ بی بی ایم پی بجٹ کے لئے ریاستی حکومت کی طرف سے مہیا کرائے گئے گرانٹ میں اضافہ کیا جائے۔ وزیر اعلیٰ سے ملاقات کے بعد اخباری نمائندوں سے بات چیت کرتے ہوئے انہوں نے کہاکہ بی بی ایم پی بجٹ کے متعلق کونسل میں 13ہزار کروڑ روپیوں کے گرانٹس کی ضرورت پیش کی گئی ہے۔ جبکہ ریاستی حکومت کی طرف سے ملنے والا گرانٹ گھٹ کر 9 ہزار کروڑ تک آگیا ہے، اسی سلسلے میں انہوں نے وزیراعلیٰ ایچ ڈی کمار سوامی سے ملاقات کرکے یہ نمائندگی کی ہے کہ شہر کی ترقی کے لئے چند نئے پراجکٹوں کی شروعات ضروری ہے اسی لئے بی بی ایم پی کے بجٹ میں اضافہ کیا ہے۔ بارش کے موسم میں شہر میں صورتحال سے نپٹنے کے لئے بی بی ایم پی کی طرف سے تمام احتیاطی اقدامات کا دعویٰ کرتے ہوئے میئر نے کہاکہ تمام علاقوں میں جہاں پر پانی بھر گیاتھا پانی بہانے کے لئے صفائی کا کام جنگی پیمانے پر شروع کیا گیاہے۔ انہوں نے کہا کہ شہر میں دوبارہ بارش کی صورتحال میں عوام کو زیادہ دشواری نہ ہو اس کے لئے احتیاطی تدابیر کے ساتھ مستعد رہنے بی بی ایم پی کے تمام افسروں اور عملے کو ہدایت دی گئی ہے۔