ایکزٹ پولس اور23 مئی کی بنیادی حقیقت میں نمایاں فرق رہے گا: پرمیشور
بنگلورو، 21مئی (ایس او نیوز) نائب وزیر اعلیٰ ڈاکٹر جی پرمیشور نے لوک سبھا انتخابات کے تمام مرحلے مکمل ہونے کے بعد ایکزٹ پولس میں بی جے پی کی جیت کے متعلق پیشین گوئی کو مسترد کردیا ہے۔ اخباری نمائندوں سے بات چیت کرتے ہوئے انہوں نے کہاکہ اکثر دیکھا گیا ہے کہ ماضی میں کئے گئے ایکزٹ پولس بری طرح ناکام رہے ہیں۔اس بار بی جے پی نے یہ تاثر قائم کرنے کے لئے کہ ملک بھر میں اس کی لہر چل رہی ہے، مختلف میڈیا گھرانوں کے ذریعے ایسے فرضی ایکزٹ پولس کروائے ہیں جن کا زمینی حقیقت سے کوئی تعلق نہیں ہے۔انہوں نے کہا کہ ایکزٹ پولس کے ذریعے جو صورتحال پیش کرنے کی کوشش کی گئی ہے وہ 23مئی کو منظر عام پر آنے والے صورتحال سے مختلف ہوگی۔انہو ں نے کہاکہ ریاست میں بی جے پی کو 18 سے 21 سیٹوں پر کامیابی کی پیشین گوئی کی گئی ہے انہوں نے اس پیشین گوئی کو غیر حقیقت پسندانہ قرار دیتے ہوئے دعویٰ کیا کہ بنیادی حقیقت یہی ہے کہ ریاست میں کانگریس جے ڈی ایس اتحاد کو 18 سے 20سیٹوں پر کامیابی حاصل ہوگی۔ انہوں نے کہاکہ ایکزٹ پولس اور الیکٹرانک ووٹنگ مشینوں کی معتبریت پر کانگریس کو بہت پہلے ہی شبہ تھا، ملک بھر میں الزامات ہیں کہ الیکٹرانک ووٹنگ مشینوں کو ہیاک کیا جارہاہے۔ اس کے باوجود بھی کہیں سے انصاف نہیں ملا ہے، صدر ہند، الیکشن کمیشن اور سپریم کورٹ سے رجوع ہوکر اپوزیشن پارٹیوں نے بیالٹ پیپر پر انتخابات کروانے کی گزارش کی لیکن بدقسمتی سے انصاف نہیں ملا۔ اب لوک سبھا انتخابات میں دوبارہ یہی گندہ کھیل کھیلنے کی کوشش کی جارہی ہے۔