بنگلورو،17؍مئی (ایس او نیوز) کرناٹک میں کورونا وائرس کے کیسوں میں اضافے کا سلسلہ جاری رہا۔ 16؍ مئی کی شام 5 بجے تک ریاست میں کورونا متاثرین کی تعداد 1092 تک پہنچ گئی۔

گزشتہ 24 گھنٹوں کے دوران 36؍ افراد کورونا سے متاثر ہوئے۔ 496 اب تک صحت یاب ہو کر اسپتالوں سے رخصت ہوچکے ہیں جبکہ 559 کا مختلف اسپتالوں میں علاج جاری ہے۔ اس وباء سے اب تک ریاست میں 36؍افراد کی موت ہوچکی ہے۔

ہفتہ کے روز بنگلورو میں 14 نئے معاملات سامنے آئے، جن میں سے تمام کے تمام شیواجی نگر سے ہیں۔ شیواجی نگر کے مریض نمبر 653 سے ربط ہونے کے شبہ میں جن میں 74 افراد کو کوارنٹائن کیا گیا تھا ان میں سے ہی یہ لوگ جانچ کے بعد متاثر پائے گئے ہیں۔ اس کے علاوہ کلبرگی میں8، ہاسن میں 4، شیموگہ میں 3، باگل کوٹ، اُڈپی، دھارواڑ، داونگیرے اور وجئے پورہ میں ایک ایک فرد متاثر ہواہے۔

محکمہ صحت کی طرف سے شام 5 بجے جاری کئے گئے بلیٹن میں متاثرین کی تفصیلات جاری کی گئیں اور بتایا گیا کہ کہ بنگلورو میں اب تک متاثرین کی تعداد 216 ہوچکی ہے۔ ان میں سے 115 صحت یاب ہوچکے ہیں، 93 زیرعلاج ہیں۔ بیلگاوی میں 114 متاثر ہوئے ، 54 ڈسچارج ہوچکے ہیں، 59 زیر علاج ہیں۔ کلبرگی میں 94 افراد متاثر ہوئے ہیں۔ 47 صحت یاب اور 40 زیر علاج ہیں۔ داونگیرے میں 89 متاثر ہوئے ہیں، 2 صحت یاب اور 83 زیر علاج ہیں۔

ریاست کے دیگر اضلاع میں بھی متعدد مریضوں کو اسپتال سے رخصت کیا جاچکا ہے۔ ریاست بھر میں 19688؍ افراد کو جن میں متاثرین سے ربط میں آنے والوں کی اکثریت ہے، نگرانی میں رکھا گیا ہے ۔ ملک کے مختلف مقامات سے اور دیگر اضلاع سے بنگلورو پہنچنے والوں کو تنظیمی یا ہوٹل کوارنٹائن کرنے کا سلسلہ جاری ہے۔ تا کہ بیرون مقامات سے آنے والوں کی وجہ سے شہر یا ریاست کے کسی بھی حصہ میں کورونا کو پھیلنے سے روکا جاسکے۔

شیواجی نگر علاقے میں 14 نئے معاملات آنے کے سبب اس علاقے میں ہفتہ کے روز پولیس کی سکیورٹی بڑھادی گئی اور لوگوں کی چہل پہل جو اب تک بے روک جاری تھی، اس کو روکنے کیلئے پولیس فورس کو بڑی تعداد میں متعین کردیا گیا ہے۔ لاک ڈاؤن کے ابتدائی مرحلہ میں جو بیریکیڈ جابجا کھڑے کئے گئے تھے۔ ان کو ہفتہ کی شام سے بحال کردیا گیا۔ شیواجی نگر سے گزرنا لوگوں کے لئے مشکل ہوچکا ہے۔