کوٹا 8 مارچ (ایس او نیوز) راجستھان کے کوٹا میں شیو راتری جلوس کے دوران الیکٹرک شاک لگنے سے 14 بچے جھلس گئے، جس میں دو بری طرح جھلس کر شدید زخمی ہوئے ہیں۔ واردات جمعہ کی دوپہر قریب 12:30 بجے ساکت پور کالی بستی میں شیو بارات کے جلوس کے دوران پیش آئی۔
میڈیا رپورٹوں کے مطابق ایک لڑکا لوہے کی سلاخ سے بنا20-22 فٹ لمبا جھنڈا اٹھائے جلوس میں چل رہا تھا جس کے دوران جھنڈا اوپر سے گزر رہے ہائی ٹینشن پاور لائن سے چھو گیا، جس سے وہاں پر موجود تمام بچوں کو بجلی کا جھٹکا لگ گیااور چودہ بچے جھلس گئے۔
واقعہ کے بعد علاقے میں کہرام مچ گیا۔ موقع پر موجود لوگ زخمی بچوں کو فوری طور پر ایم بی بی ایس اسپتال لے گئے، جہاں وہ زیر علاج ہیں۔
کوٹا ایس پی امریتا دوہان نے معلومات فراہم کرتے ہوئے بتایا کہ جب یہ واقعہ پیش آیا تو بچے، کالی بستی کے دیگر افراد کے ساتھ جلوس میں شامل تھے۔ دو بچوں کو شدید چوٹیں آئیں ہیں جن میں سے ایک بچہ 70% جھلس گیا ہے اور دوسرا 50%، جبکہ دیگر بارہ کو 50% سے کم چوٹیں آئیں ہیں۔ زخمیوں کو فوری طور پر علاج کے لیے اسپتال منتقل کیا گیا ہے۔
ایس پی دوہان نے صورتحال کی سنگینی پر زور دیتے ہوئے کہا کہ سوائے ایک خاتون کے جس کی عمر 25 سال ہے، باقی تمام متاثرین کی عمریں 15 سال یا اس سے کم ہیں۔