ریاستی کابینہ میں ردوبدل یقینی: ستیش جارکی ہولی
بنگلورو،28/مئی(ایس او نیوز) ریاستی وزیر جنگلات ستیش جارکی ہولی نے ریاستی کابینہ میں توسیع اور ردبدل کی تصدیق کرتے ہوئے کہا ہے کہ وزارت میں چند لوگوں کو شامل کیا جائے گا اور بعض کو برطرف بھی کیا جائے گا۔ تاہم اس سلسلے میں انہوں نے کہاکہ ابھی طے نہیں ہوا ہے کہ وزارت میں کسے شامل کیا جائے۔ اخباری نمائندوں سے بات چیت کرتے ہوئے انہوں نے کہاکہ حالیہ کابینہ اجلا س میں اس موضوع پر بحث ہوئی ہے، بی جے پی کی طرف سے شروع ہونے والے آپریشن کمل کو ناکام بنانے کے لئے برگشتہ اراکین اسمبلی کو وزارت دینے پر سبھی نے اتفاق کرلیاہے۔ اب کانگریس اعلیٰ کمان کی ہدایت کے مطابق کن وزراء کو ہٹایا جائے گا، او رکن کو شامل کیا جائے اس کا فیصلہ بھی ریاستی قیادت کی طرف سے کیا جائے گا۔ رمیش جارکی ہولی کی بی جے پی لیڈروں کے ساتھ ساز باز اور ملاقاتوں کے بارے میں ستیش جارکی ہولی نے کہا کہ رمیش کیا کرتے ہیں اس سے انہیں کچھ سروکار نہیں ہے، اور انہیں وزارت میں شامل کیا بھی گیا تو امید یہی ہے کہ وہ پہلے ہی کی طرح پارٹی کو مضبوط کرنے کے لئے کام کرتے رہیں گے۔ستیش جارکی ہولی نے کہاکہ وہ اپنے طور پر رمیش کو منانے کی کوئی کوشش نہیں کریں گے، کیونکہ اس سے پہلے بارہا وہ یہ کوشش کرچکے ہیں۔ اب پارٹی اگر کوشش کرے تو کرے وہ اس کا حصہ نہیں بنیں گے۔ انہوں نے کہاکہ رمیش جارکی ہولی کے کسی غلط فیصلے سے اگر مخلوط حکومت گر جائے تو کانگریس پارٹی ریاست میں از سر نو عوامی فرمان کے لئے تیار ہے۔