نئی دہلی 20/اپریل (ایس او نیوز) ہندوستان کی اٹھارویں لوک سبھا انتخابات کے پہلے مرحلے میں جمعہ کو 102 سیٹوں کے لیے ہوئی ووٹنگ میں 62 فیصد سے زیادہ ووٹروں نے اپنی حق رائے دہی کا استعمال کیا۔ اس کے ساتھ ہی 543 رکنی لوک سبھا کی 102 نشستوں پر مقابلہ کرنے والے کل 1625 امیدواروں کا انتخابی مستقبل الیکٹرانک ووٹنگ مشینوں کے میموری کارڈ میں بند ہوگیاہے۔ ان میں بی جے پی کے سینئر لیڈر نتن گڈکری، کرن رجیجو، سربانند سونووال، ارجن رام میگھوال اور بھوپیندر یادو سمیت آٹھ مرکزی وزراء بھی شامل ہیں۔

الیکشن کمیشن کی طرف سے جاری پریس ریلیز کے مطابق ووٹنگ مجموعی طور پر آسان اور پرامن طریقے سے ہوئی۔ مغربی بنگال اور منی پور میں تشدد کے چند واقعات کے علاوہ پورے ملک میں ووٹنگ کا عمل پرامن طریقے سے ہوا۔ لوک سبھا کے پہلے مرحلے کے ساتھ ساتھ اروناچل پردیش اسمبلی کی تمام 60 اور سکم اسمبلی کی تمام 32 سیٹوں کے انتخابات بھی مکمل کئے گئے۔

کمیشن کی طرف سے رات 9 بجے جاری کردہ ریلیز کے مطابق، لوک سبھا انتخابات کے پہلے مرحلے میں، 102 حلقوں میں رجسٹرڈ کل 16.63 کروڑ ووٹروں میں سے جمعہ کو 62.37 فیصد سے زیادہ ووٹنگ ریکارڈ کی گئی۔ بتایا گیا ہے کہ دور دراز علاقوں کے انتخابی مراکز کے ووٹنگ کے اعداد و شمار بڑھ بھی سکتے ہیں۔

کمیشن نے ایک ریلیز میں کہا کہ ووٹنگ کا اختتامی وقت ختم ہونے کے بعد بھی کئی پولنگ اسٹیشنوں پر ووٹر قطاروں میں کھڑے تھے۔