الیکٹرانک ووٹنگ مشینیں سخت نگرانی میں اسٹرانگ رومس منتقل
بنگلورو،21؍اپریل(ایس او نیوز) جنوبی کرناٹک کے 14 پارلیمانی حلقوں میں کل پہلے مرحلے کی پولنگ کے دوران ڈالے گئے ووٹ الیکٹرانک ووٹنگ مشینوں میں قید ہیں ، اور ان الیکٹرانک ووٹنگ مشینوں کو مرکزی دستوں کی سیکورٹی کے تحت اسٹارنگ رومس میں قید کردیا گیا ہے۔ 23 مئی کو ووٹوں کی گنتی کے مرحلے میں اب یہ اسٹرانگ روم کھولے جائیں گے۔ الیکٹرانک ووٹنگ مشینوں کے ساتھ ان سے منسلک وی وی پیاٹ مشینیں اور دیگر انتخابی مواد کل دیر رات تک اسٹرانگ رومس میں پہنچا دیا گیا اور الیکشن کمیشن کے عملے نے سخت نگرانی کے تحت انہیں ترتیب وار جمع کرادیا ہے۔ ایک اندازے کے مطابق کل ریاست بھر میں تقریباً 70 فیصد پولنگ ہوئی ہے۔ ایک طرف کانگریس جے ڈی ایس اتحاد اور دوسری طرف بی جے پی کے درمیان ان انتخابات میں مقابلہ کانٹے کا رہا ہے۔ پہلے مرحلے کے انتہائی اہم امیدواروں میں سابق وزیر اعظم ایچ ڈی دیوے گو ڈا ، مرکزی وزیر سدانند گوڈا، وزیراعلیٰ کمار سوامی کے فرزند نکھل کمار سوامی، ریاستی وزیر کرشنا بائرے گوڈا، ریاست کے واحد مسلم امیدوار رضوان ارشد ، وزیر برائے تعمیرات عامہ ایچ ڈی ریونا کے فرزند پرجول ریونا وغیرہ شامل تھے۔ پہلے مرحلے میں جنوبی کرناٹک کے عوام نے کل 14 حلقوں میں 241امیدواروں کی قسمت کا بٹن دبایا ہے۔ انتخابات کا پہلا مرحلہ مکمل ہونے کے بعد مختلف پارٹیوں سے امیدواروں کے مظاہرے کو لے کر قیاس آرائیوں کے بازار بھی گرم ہوگئے۔ہر کوئی اپنے اپنے علاقے میں ہوئی ووٹنگ کی بنیاد پر ہار جیت کے حساب کتاب میں لگا ہوا تھا۔