منشیات کیس:آیندریتا رائے اور دگنت سے پوچھ تاچھ، سنجنا گلرانی کی سی سی بی حراست ختم، دو دن کیلئے جیل، دیگر ملزمین 14دن تک جیل میں
بنگلورو،18؍ستمبر(ایس او نیوز) منشیات مافیا کیس کی جانچ کے سلسلہ میں چہارشنبہ کے روزکنڑا اداکارجوڑی دگنت اور آئیندریتا رائے پوچھ گچھ کے لئے شہر کی سنٹرل کرائم برانچ (سی سی بی) کے روبرو حاضر ہو ئے اور ان دونوں سے الگ الگ چار گھنٹوں تک پوچھ گچھ کی گئی اور بعد میں ان دونوں کو جانے دے دیا گیا۔
بتایا جاتا ہے کہ سری لنکا کے ایک کیسینو کی پارٹی میں ایندریتا رائے کی شرکت اور وہاں پروگرام پیش کرنے کے ویڈیو سوشیل میڈیا پر ہو نے کے سبب سی سی بی نے انہیں طلب کیا اور منشیات مافیا کے بارے میں معلومات حاصل کیں۔ بتایا جاتا ہے کہ دگنت اور ایئندریتا نے اس کے بارے میں لاعملی کا اظہار کیا اور سی سی بی کی اس جانچ میں ہر طرح سے تعاون کرنے کا تیقن دیا جس کے بعد ان دونوں کو جانے دے دیا گیا۔ پوچھ گچھ کے دوران ایندریتا رائے نے بتایا کہ سری لنکا کے بلیس کیسینو میں عید کے بعد ہونے والی پارٹی میں شرکت کے لئے انہیں شیخ فاضل نے مدعو کیا تھا اور اس پارٹی میں ان کی شرکت صرف پروگرام پیش کرنے تک محدود تھی۔
اس کے علاوہ وہاں کی سرگرمیوں کے بارے میں وہ کچھ نہیں جانتیں۔ آیندریتا نے بتایا کہ شیخ فاضل کی طرف سے دعوت کے متعلق وہ بہت پہلے ہی ٹویٹ کر چکی ہیں اور یہ کافی پرانی بات ہو چکی ہے۔ سی سی بی سے باہرنکل کر آیندریتا نے میڈیا کو بتایا کہ افسروں نے ان سے جو جانکاری مانگی وہ پورے طور پر دی گئی ہے اور انہوں نے وعدہ کیا ہے کہ اس معاملہ کی جانچ میں وہ سی سی بی کا مکمل تعاون کریں گی۔ انہوں نے کہا کہ منشیات مافیا کی سرگرمیوں کے بارے میں انہیں کچھ علم نہیں ہے۔بتایا جاتا ہے کہ جائنٹ کمشنر آف پولیس (کرائم) سندیپ پاٹل کی نگرانی میں سی سی بی افسروں کی دو الگ الگ ٹیموں نے ایندریتا اور دگنت سے الگ الگ سوالات کئے۔سندیپ پاٹل نے ان دونوں سے پوچھ تاچھ کے بارے میں میڈیا کو بتایا کہ ایندریتا کے ذریعے سی سی بی کو اس کیس کے متعلق کافی معلومات حاصل ہوئی ہیں جو آنے والے دنوں میں جانچ کے لئے مدد گار ہوں گی۔
انہوں نے کہا کہ فی الوقت ان دونوں کو جانے دیا گیا ہے اور کہا گیا ہے کہ آئندہ اگر ضرورت پڑے گی تو ان کو سمن جاری کر کے دوبارہ طلب کیا جا سکتا ہے۔انہوں نے بتایا کہ منشیات کیس کے سلسلے میں کارروائی کرتے ہوئے سی سی بی نے ایک اور غیر ملکی ملزم افریقی نژاد بنال، اڈین کو گرفتار کیا ہے۔ اس ملزم کو شہر کے کاٹن پیٹ پولیس تھانے کی حدود میں گرفتار کیا گیا ہے۔ اس کے پاس سے منشیاتی مادہ کوکین بھی برأمد کیا گیا ہے۔