گاندھی جی کے خواب کو پوراکرنے کیلئے ”بھارت جوڑو یاترا“:ڈی کے سریش
ہاسن، 29؍ستمبر(ایس او نیوز)گاندھی جی کے خواب کو پوراکرنے کیلئے یہ بھارت جوڑو پد یاتراراہل گاندھی کی طر ف سے شروع کی گئی ہے،بی جے پی حکومت کے انتظامیہ سے ملک میں امن باقی نہیں رہاہے،ہر جگہ نفرت کا ماحول ہے،اس ماحول کو ختم کرکے عوام کو پرامن ماحول فراہم کرنے کے مقصد سے یہ یاترا کی جارہی ہے۔ان باتوں کا اظہا ر رکن پارلیمان ڈی کے سریش نے کیا۔
انہوں نے یہاں شہر کی مضافات میں واقع ہولے نرسی پورہ روڈ کے قریب ننداگوکولا سمودایا بھون میں بھارت جوڑو یاترا کی تیاریوں کے سلسلے میں طلب کردہ اجلاس سے خطاب کرتے ہوئے کہاکہ راہل گاندھی کا پدیاتراکرنے کا مقصدصرف یہی ہے کہ ملک میں امن قائم ہوسکے اور ملک کے عوام کو جوڑاجاسکے،ملک کی فلاح وبہبودی اسی میں ہے کہ ملک کے تمام عوام متحدہوں اور ملک کی ترقی کی جانب توجہ دیں۔آزادی کے بعد دستور کی حفاظت کیلئے جدوجہد کرناہر شہری کی ذمہ داری ہے،ملک میں زندگی گزاررہے سبھی کو چاہئے کہ بسونا کے اصولوں کو اپنائیں اور کوئمپو کے اس امن کے گہوارے میں امن کی برقراری کیلئے اس یاترا کو کامیاب بنائیں۔وزیر اعظم نے یہاں آکر کہاتھاکہ سدارامیا کی حکومت 10فیصد کمیشن کی حکومت ہے،ا ب بنگلور آکر کسی سے بھی پوچھ لیں تو بی جے پی کی 40فیصد حکومت ہونے کا ثبوت دینے کیلئے تیارہیں۔راہل گاندھی کی قیادت میں ملک بھر میں بھارت جوڑو یاترا شروع کی گئی ہے۔یہ پانچ ماہ تک جاری رہے گی اور ملک بھر میں تقریباً3500 کلومیٹر تک پدیاترا کی جائے گی،اسے صرف ایک پارٹی کا پروگرام نہیں سمجھناچاہئے،ہر ایک ترقی پسند تنظیم، کسان تنظیموں کے علاوہ بی جے پی مخالف تمام تنظیموں کو اس میں حصہ لیناچاہے۔
اے آئی سی سی سکریٹری روزی جان نے کہاکہ ریاست میں 40فیصد کی حکومت اقتدار پر ہے، ترقیاتی کام کرنے کی بجائے صرف رقم لوٹنے کے کام میں مصروف ہے، ملک میں روز مرہ کی اشیاء کی قیمتوں میں مسلسل اضافہ سے عوام کو کافی مشکلات کا سامناکرناپڑرہاہے۔پٹرول،ڈیزل کی قیمتو ں میں اضافہ، نوجوانوں میں بے روزگاری کا مسئلہ سمیت دیگر مسائل کا سامناکررہے عوام اس حکومت سے بیزار ہوچکے ہیں۔
اس اجلاس میں سابق رکن اسمبلی سی ایس پٹے گوڈا،مہیلا کانگریس کی صدر تاراچندن،سابق ریاستی وزیر بی شیورام،دھروانارائن،گوپال سوامی،عبدل عادل،پیر صاحب،سید صمد اوردیگر موجود تھے۔