بھاری برسات نے پھر مچائی شمالی کرناٹکا میں تباہی۔ مکانات اور فصلوں کو زبردست نقصان۔ تین افراد ہوگئے ہلاک
دھارواڑ 8/اکتوبر (ایس او نیوز) چکمگلورو، گدگ اور دھارواڑ کے علاقے میں بھاری برسات نے پھر ایک بار تباہی مچادی ہے۔ 6 اکتوبر کو بادلوں کی گرج اور بجلیوں کی کڑک کے ساتھ برسنے والی بارش کی وجہ سے تین افراد ہلاک ہوگئے ہیں جبکہ مکانات اور مکئی، سورج مکھی، کپاس، مونگ پھلی جیسی فصلوں کو زبردست نقصان پہنچا ہے۔
ہاویری شہر کے مختلف علاقے برساتی پانی میں ڈوب گئے اور بجلی کی فراہمی منقطع ہوگئی۔ہووینا ہاڈگلی نامی مقام پر بیک وقت 14مکانات زمین بوس ہوگئے۔جبکہ چکمگلورو میں کئی گھروں کو جزوی نقصان پہنچا ہے۔باگلکوٹ تعلقہ میں واقع کیراسور میں بھاری برسات سے جب مکان گر گیا تو اس میں دب کر گوروّا ایرپّا (55سال)، پکیرپّا ہرساڈ(65سال) اور نینگپّا ایرپّا (32سال) ہلاک ہوگئے۔مکان کے گرنے کا علم ہوتے ہی فائر بریگیڈ عملہ موقع پر پہنچا اور ملبے سے تینوں لاشیں نکالی گئیں۔ اس گھر کے مکینوں میں ننگپا کی بیوی سویتا اورا ن کی بیٹی کی جان بچ گئی ہے۔
ایم ایل اے ویرنّا چرنڈی مٹھ نے جائے واردات پر پہنچ کر گھر والوں کی تعزیت کی اور ہلاک ہونے والوں کے وارثین کو پانچ لاکھ روپے فی کس حساب سے معاوضہ اداکرنے کا اعلان کیا۔اس کے علاوہ انہوں نے گرام پنچایت کے ذمہ داران کو ہدایت دی کہ متاثرہ خاندان کا مکان ازسر نوتعمیر کرکے دیا جائے۔