بنگلورو،26/مئی(ایس او نیوز)  ٹمکور میں سابق وزیراعظم ایچ ڈی دیوے گوڈا کو شکست دینے والے بی جے پی رکن پارلیمان جی ایس بسوراج نے کہا ہے کہ اس حلقے سے سابق وزیراعظم کی امید واری ان کی جیت کے لئے آسان ثابت ہوئی۔ اخباری نمائندوں سے بات چیت کرتے ہوئے انہوں نے کہاکہ دیوے گوڈا کی جگہ اگر اس حلقے کے سابق رکن پارلیمان ایس پی مدوہنومے گوڈا میدان میں رہتے تو شاید ان کا کامیاب ہونا ممکن ہوتا۔ انہوں نے کہاکہ دیوے گوڈا کی خاطر کانگریس قیادت نے مدو ہنومے گوڈا جیسے رکن پارلیمان کو ٹکٹ سے محروم کیا تو حلقے کے عوام نے کانگریس اور جے ڈی ایس دونوں ہی کو مسترد کردیا۔ مدھوگیری حلقے میں کانگریس لیڈر کے این راجنا کی طرف سے انہیں ملنے والی تائید پر ان کا شکریہ ادا کرتے ہوئے جی ایس بسوراج نے کہاکہ اپنی پارٹی کی سخت ہدایت کی پرواہ کئے بغیر کے این راجنا نے ان کی حمایت کی اور اس کی بدولت انہیں مدھوگیری حلقے سے اچھی برتری ملی۔مودی کے دوبارہ وزیراعظم بننے پر سرگرم سیاست سے سبکدوش ہوجانے کے متعلق ایچ ڈی ریونا کے چیلنج کے بارے میں جی ایس بسوراج نے کہا کہ اسے سنجیدگی سے نہ لیا جائے کیونکہ دیوے گوڈا خاندان نے کبھی سچ نہیں بولا ہے۔ ہاسن پارلیمانی حلقے سے منتخب دیوے گوڈا کے پوتے پرجول ریونا کی طرف سے دادا کی خاطر استعفے کی پیش کش کو ایک ناٹک قرار دیتے ہوئے انہوں نے کہاکہ اگر دادا کی جیت کی اتنی ہی فکر تھی تو پرجول کو چاہئے تھاکہ ہاسن سے خود انتخاب نہ لڑتے اور دادا کو انتخاب لڑنے کا موقع وہیں سے دیدیتے۔