بنگلورو،7/جون(ایس او نیوز/ایجنسی) ریاستی وزیر اعلیٰ سدارامیا نے کرناٹک حج بھون میں حج پروازوں کی روانگی کا افتتاح کیا- 7جون کی علی الصباح بنگلور ایرپورٹ سے حج پروازوں کی روانگی کا سلسلہ شروع ہوجائے گا-

حج پروازوں کی افتتاحی تقریب میں خطاب کرتے ہوئے سدارامیا نے عازمین حج کو مبارکباد دیتے ہوئے کہاکہ آپ لوگوں (مسلمانوں) کی تائید ہی سے ہم اقتدار پر آئے ہیں -ہماری حکومت اقلیتوں کے جان ومال کے تحفظ کی پابند ہے - انہوں نے کہاکہ کانگریس نے اپنے انتخابی منشور میں جو وعدے کئے اور جن اسکیموں کا اعلان کیا ہے اس پر ہم عمل کریں گے -

انہوں نے کہاکہ سابقہ بی جے پی حکومت میں مسلمانوں کو جن پریشانیوں کا سامنا کرنا پڑا، اور جو ناانصافیوں ہوئیں ان سے ہم اچھی طرح واقف ہیں -اب ہماری حکومت کہیں بھی کسی کو اخلاقی پولیس بننے کی اجازت نہیں دے گی اس کو ختم کرنے متعلقہ افسروں کو ہدایت دی گئی ہے -انہوں نے کہاکہ ہماری پارٹی نے مسلمانوں سے جو وعدے کئے ہیں ان کو ضرور پورا کیا جائے گا- عازمین سے انہوں نے التجا کی کہ وہ ہمارے ملک اور ریاست کرناٹک میں امن وامان کیلئے دعا کریں -انہوں نے کہاکہ ان کی حکومت نے جن 5 گیارنٹی اسکیموں کو نافذ کیا ہے اس سے تمام طبقات کا فائدہ ہوگا- حج بھون کی دیکھ بھال کیلئے درکار گرانٹ جاری کرنے کا انہوں نے وعدہ کیا -

اس تقریب میں ریاستی وزیربرائے ہاؤزنگ امور اقلیت واوقاف بی زیڈ ضمیراحمدخان نے کہا کہ سابقہ بی جے پی حکومت نے حج بھون کی دیکھ بھال کیلئے گرانٹ جاری نہیں کیا جب کہ سدارامیا نے اقتدار سنبھالنے کے دوسرے ہی دن حج بھون کی دیکھ بھال کیلئے 5کروڑ کا گرانٹ منظورکیا ہے جو جلد ہی جاری کردیا جائے گا-انہوں نے کہاکہ اس سے پہلے جب سدارامیا حکومت تھی تب حج بھون کی تعمیروترقی کیلئے 100 کروڑ روپئے جاری کئے گئے تھے -ریاستی وزیر برائے محصولات کرشنا بائرے گوڈا نے اجلاس کی صدارت کی -

تقریب میں ریاستی وزیر برائے بلدی انتظامیہ وحج رحیم خان اوردیگر نے بھی شرکاء سے خطاب کیا -اس پروگرام میں شرکت کرنے والوں میں مفتی افتخار احمد قاسمی، مولانا مقصودعمران رشادی، مولانا تنویر ہاشمی، مولانا زین العابدین، محمدرؤف الدین کچہری والے،وزیراعلیٰ کے پولیٹیکل سکریٹری نصیراحمد، رکن راجیہ سبھا سیدناصرحسین، آرروشن بیگ، منوزجین، آئی اے ایس، ریاستی وزیر کے ایچ منی اپا، سلیم احمد اورریاستی حج کمیٹی کے اراکین شامل ہیں - ریاستی اقلیتی کمیشن چیرمین عبدالعظیم،وقف بورڈ چیرمین مولانا شافع سعدی شامل ہیں - ریاستی حج کمیٹی کے ایگزی کیٹیو افسرسرفراز خان سردار نے تمام کا خیرمقدم کیا-

بنگلورو سے عازمین حج کی روانگی کا سلسلہ افتتاحی تقریب کے بعد دیر رات خصوصی بسوں کے ذریعے حج بھون سے شروع ہوا- علمائے کرام کی دعاؤں اور لبیک اللہم لبیک کی صداؤں کے ساتھ عازمین حج کو ان کے رشتہ داروں اوراقرباء نے بڑی تعداد میں جمع ہوکر اس سفر مقدس کیلئے وداع کیا -پہلے دن عازمین حج کی 5 پروازیں روانہ ہوئیں، جن میں سے ایک براہ مسقط اورباقی 4 راست جدہ کیلئے روانہ ہورہی ہیں -ہر فلائٹ میں 150 عازمین کے سفرکی گنجائش رکھی گئی ہے - فلائٹس کی روانگی کی ترتیب سے جن عازمین کی بکنگ کی گئی ہے اسی حساب سے ان کے قافلوں کو بھی حج کیمپ سے وداع کیا گیا -عازمین کیلئے کیمپے گوڈا انٹرنیشنل ایرپورٹ پر خصوصی حج ٹرمنل تیار کیا گیا ہے جہاں ان کیلئے ایمیگریشن اور کسٹمس کے انتظام کے ساتھ ساتھ نمازکیلئے وضو خانے اور دیگر سہولتیں بھی مہیا کروائی گئی ہیں - بڑی تعداد میں رضاکار حسب معمول حج بھون اور ایرپورٹ کے حج ٹرمنل میں عازمین حج کے سفرکو اور آسان بنانے کیلئے دن رات خدمات انجام دینے کیلئے لگ گئے ہیں -

بنگلورو سے 7 ہزار سے زائد عازمین حج 7 جون تا22 جون جملہ 51 پروازوں سے سفرحجاز پر روانہ ہورہے ہیں - پہلے روز 5فلائٹس اور باقی تمام دن روزانہ 3 پروازوں کے ذریعے عازمین کی روانگی طے کی گئی ہے - اس بار حج بھون میں عازمین اور رشتہ داروں کا ہجوم زیادہ نہ ہو اسی لئے عازمین کی روانگی کی شیڈول کو اس طرح ترتیب دیا گیا ہے کہ ہر دن تقریباً 500 عازمین روانہ ہوسکیں اور رشتہ داروں کا زیادہ ہجوم بھی حج بھون میں جمع ہونے نہ پائے تاکہ عازمین کی روانگی میں کسی طرح کی مشکل حائل نہ ہو-