دہلی میں کورونا معاملے ایک لاکھ سے تجاوز ، 3213 اموات
نئی دہلی،9؍جولائی(ایس او نیوز؍ایجنسی) راجدھانی دہلی میں کل کورونا وائرس کے نئے معاملوں کی تعداد پھر سے دو ہزار سے زیادہ ہوگئی۔ آج 2033 معاملے سامنے آنے کے بعد متاثرین کی کل تعداد 104864 ہوگئی جبکہ مرنے والوں کی تعداد 3213 پر پہنچ گئی ہے۔
پیر کو نئے معاملے گھٹ کر 1379 آنے کے بعد کچھ راحت محسوس ہوئی تھی لیکن معاملوں میں پھر سے اضافہ باعث تشویش ہے۔ دہلی حکومت کے وزارت صحت کی جانب سے کل دیرشام جاری اعداد و شمار کے مطابق گزشتہ 24 گھنٹوں کے دوران 3982 مریضوں کے وائرس سے آزاد ہونے کے بعد صحت مند ہونے والوں کی تعداد بڑھ کر 78199 ہوگئی ہے۔
مہاراشٹر اور تمل ناڈو کے بعد دلی تیسری ریاست ہے جہاں متاثرین کا تعداد ایک لاکھ سے زیادہ ہے۔ مہاراشٹر میں وائرس سےمتاثر ہونے والوں کی تعداد دو لاکھ سے بھی زیادہ ہے۔
اس دوران کنٹیمنمنٹ زون کی تعداد بڑھ کر 458 ہوگئی جو باعث تشویش ہے۔ دہلی میں 23 جون کو 3947 ایک دن میں سب سے زیادہ معاملے آئے تھے۔ دہلی میں سرگرم معاملوں کی تعداد 23452 ہے۔
کورونا جانچ میں گزشتہ کچھ دنوں میں تیزی آنے سے یہ تعداد 701859 پر پہنچ گئی ہے۔ گزشتہ 24 گھنٹوں کے دوران دلی میں 22028 جانچیں کی گئیں ان میں آر ٹی پی سی آر جانچ 9461 اور ریپیڈ انٹیجن جانچ 12567 تھی۔
تین جولائی کو ریکارڈ 24165 جانچ کی گئی تھیں۔ دہلی میں 10 لاکھ کی آبادی پر جانچ کا اوسط بھی بڑھ کر 36969 ہوگیا ہے۔
دہلی میں کورونا بیڈ کی تعداد 15096 ہے جس میں سے 4859 پر مریض ہیں جبکہ 10237 خالی ہیں۔ ہوم آئسولیشن میں مریضوں کی تعداد کل کے 16608 سے کم ہوکر 14661 مریض رہ گئی ہے۔