نئی دہلی،2؍دسمبر(آئی این ایس انڈیا) دہلی کے ایک وکیل نے جمعرات کو سماج وادی پارٹی (ایس پی) کے لوک سبھا ایم پی شفیق الرحمان برق کے خلاف رام مندر کی تعمیر کے بارے میں ان کے حالیہ بیان پر دہلی پولیس میں شکایت درج کرائی ہے۔ شکایت کے مطابق شفیق الرحمان برق نے اپنے حالیہ بیان میں کہا ہے کہ رام مندر زبردستی بنایا جا رہا ہے۔ اس کی تعمیر قانون کے خلاف ہے۔

بابری مسجد کو شہید کر کے مندر بنایا جا رہا ہے۔دہلی میں مقیم ایک پریکٹس کرنے والے وکیل ونیت جندال نے شکایت میں کہاہے کہ سپریم کورٹ آف انڈیا نے 9 نومبر 2019 کو ایک فیصلہ سنایا، جس کے بعد ایودھیا میں رام مندر کی تعمیر شروع ہو گئی۔ مسلم کمیونٹی کو الگ الگ جگہ دی گئی۔زمین بھی دی گئی، ملزم کا بیان سپریم کورٹ کے فیصلے پر سوال اٹھاتا ہے۔یہ عدالت کے فیصلے کی توہین ہے، یہ توہین آمیز اور اشتعال انگیز بیان ہے۔

شکایت کنندہ نے الزام لگایا کہ ایک مقبول عوامی شخصیت جو اس وقت ممبر پارلیمنٹ بھی ہیں، کا ایسا بیان ہندو اور مسلم برادریوں کے درمیان نفرت پیدا کرنے کی کوشش ہے۔ وکیل نے کہاہے کہ ان کا بیان عدلیہ میں عدم اعتماد کو بھی ہوا دیتا ہے۔ ہمارا ملک ایک سیکولر اور جمہوری ملک ہے۔

یہ بیان ملک میں فساد برپا کرنے اورجنگ چھیڑنے کی کوشش ہے۔جندال نے لوک سبھا کے رکن پارلیمنٹ کے خلاف تعزیرات ہند (IPC) کی دفعہ 121، 153، 153A اور B، 295، 298 اور 505 کے تحت ایف آئی آر درج کرنے کا مطالبہ کیا ہے جو قابلِ سزا جرم ہیں اورنوعیت میں بہت سنگین ہیں۔