نئی دہلی، یکم دسمبر (آئی این ایس انڈیا) دہلی ہائی کورٹ نے منگل کوایک عرضی پر مرکز سے جواب طلب کیاہے جس میں اسپیشل ،ہندومیرج اور غیر ملکی شادی قوانین کے تحت ہم جنس شادی کو تسلیم کرنے کی درخواستوں پر کارروائی کی براہ راست نشریات کی درخواست کی گئی ہے۔چیف جسٹس ڈی این پٹیل اور جسٹس جیوتی سنگھ کی بنچ نے مرکزکے وکیل کو اس معاملے پر ہدایات لینے اور جواب داخل کرنے کا وقت دیا اور معاملے کی مزید سماعت 3 فروری کو مقرر کی ہے۔عدالت متعددہم جنس پرست جوڑوں کی طرف سے دائر درخواستوں کی سماعت کر رہی تھی جس میں اسپیشل، ہندو اور غیر ملکی شادی کے قوانین کے تحت ہم جنس شادی کو تسلیم کرنے کا مطالبہ کیا گیا تھا۔

کچھ عرضی گزاروں کی نمائندگی کرتے ہوئے سینئر وکیل نیرج کشن کول نے دلیل دی ہے کہ اس میں شامل حقوق کے پیش نظر، کارروائی کی لائیو سٹریمنگ ضروری ہے کیونکہ یہ ملک کی کل آبادی کے سات سے آٹھ فیصد سے متعلق ہے۔انہوں نے کہاہے کہ یہ قومی اہمیت کا معاملہ ہے اورلائیواسٹریمنگ ایک بڑی آبادی کی نمائندگی کر سکتی ہے۔ہائی کورٹ نے بھی دوالگ الگ درخواستوں پر نوٹس جاری کیا اورمرکزسے جواب طلب کیا۔ ان میں سے ایک دو خواتین کی طرف سے دائر کی گئی ہے جنہوں نے پہلے ہی بیرون ملک اپنی شادی کروا رکھی ہے اوریہاں شناخت کی درخواست کی ہے اور دوسری ایک ٹرانس جینڈر نے دائر کی ہے جس نے جنس کی تبدیلی کی سرجری کروائی ہے۔