نئی دہلی، 28 مئی(ایس او نیوز/آئی این ایس انڈیا) دہلی ہائی کورٹ نے منی لانڈرنگ کیس میں رابرٹ واڈرا کو نوٹس جاری کیا ہے۔واڈرا کو یہ نوٹس ڈائریکٹوریٹ جنرل آف اکنومک انفورسمنٹ(ای ڈی) کی اس عرضی پر کیا گیا ہے جس میں جانچ ایجنسی نے واڈرا کی ضمانت مسترد کرنے کے لئے ہائی کورٹ کا دروازہ کھٹکھٹایا ہے۔معاملے میں اگلی سماعت 17 جولائی کو کی جائے گی۔ہائی کورٹ پہنچی ای ڈی کا کہنا ہے منی لانڈرنگ سے جڑے معاملے میں رابرٹ واڈرا تحقیقات میں تعاون نہیں کر رہے ہیں اور نہ ہی ایجنسی کے کسی سوال کا جواب دے رہے ہیں۔رابرٹ واڈرا سے اب تک ای ڈی 58 گھنٹے پوچھ گچھ کر چکی ہے۔ای ڈی کی جانب سے ہائی کورٹ میں سماعت کے دوران پیش ہوئے تشار مہتا نے کہا کہ کیونکہ رابرٹ واڈرا جانتے ہیں کہ ان کی گرفتاری نہیں کی جا سکتی اس لئے وہ کسی سوال کا جواب نہیں دے رہے ہیں،لہذا ان کی ضمانت مسترد ہونا ضروری ہے اور ای ڈی ان حراست میں لے کر پوچھ گچھ کرنا چاہتی ہے۔رابرٹ واڈرا کی مشکلیں آنے والے وقت میں بڑھ سکتی ہیں کیونکہ دہلی ہائی کورٹ نے رابرٹ واڈرا کو نوٹس جاری کرکے پوچھا ہے کہ کیوں نہیں ان کی ضمانت منسوخ کر دی جائے، کیونکہ ای ڈی انہیں حراست میں لے کر پوچھ گچھ کرنا چاہتی ہے۔دراصل منی لانڈرنگ کیس میں دہلی کی نچلی عدالت نے رابرٹ واڈرا کو ضمانت دی تھی۔نچلی عدالت کے فیصلے کے خلاف ای ڈی نے ہائی کورٹ میں اپیل دائر کی تھی۔ہائی کورٹ میں پیر کو جسٹس چندر شیکھر کی عدالت میں کیس پر سماعت ہوئی۔سالیسٹر جنرل تشار مہتا سے سماعت کے دوران عدالت نے پوچھا کہ کیا معاملے میں چارج شیٹ دائر کی جا چکی ہے۔تشار مہتا نے بتایا کہ اس معاملے میں ابھی تک چارج شیٹ عدالت میں داخل نہیں ہوئی ہے۔اس کے بعد کورٹ نے واڈرا کو نوٹس جاری کرتے ہوئے 17 جولائی سے پہلے جواب دائر کرنے کے لئے کہا ہے۔ای ڈی کا الزام ہے کہ لندن میں خریدی گئی پراپرٹی کو غلط طریقے سے خریدا گیا ہے اور اس میں بلیک منی کا استعمال کیا گیا ہے،لہذا اس معاملے میں ای ڈی واڈرا سے کئی بار پوچھ گچھ بھی کر چکی ہے۔واڈرا کے علاوہ اس معاملے میں ای ڈی نے بہت لوگوں سے بھی پوچھ گچھ کی تھی۔ای ڈی کا دعوی ہے کہ منی لانڈرنگ سے متعلق اس معاملے میں رابرٹ واڈرا کے خلاف ان کے پاس دستاویزات اور ای میل کی شکل میں بہت سے ٹھوس ثبوت موجود ہیں۔بہرحال، اب دیکھنا ہوگا کہ واڈرا 17 جولائی سے پہلے اپنے جواب میں عدالت کو کیا کچھ کہتے ہیں اور ای ڈی اس کا کورٹ میں کس طرح مقابلہ کرتی ہے۔اگر ای ڈی اس معاملے میں ہائی کورٹ سے رابرٹ واڈرا کی ضمانت مسترد کرانے میں کامیاب ہوتی ہے تو یہ رابرٹ واڈراکے لیے بہت بڑادھچکاہو گا۔