مودی پر تبصرہ کے معاملے میں ششی تھرور کے خلاف وارنٹ جاری
نئی دہلی، 12 نومبر (آئی این ایس انڈیا)پی ایم نریندر مودی پر قابل اعتراض تبصرہ کرنے پر درج ہتک عزت کیس میں عدالت نے کانگریس لیڈر ششی تھرور کے خلاف ضمانتی وارنٹ جاری کیا ہے۔دہلی کی راج ایونیو کورٹ نے بی جے پی لیڈر راجیو ببر کی جانب سے دائر کیس کو لے کر اس کا حکم دیا۔ششی تھرور کو شخصی طور پرعدالت میں پیش ہونا تھا، لیکن ان کے موجود نہ رہنے پر عدالت نے یہ وارنٹ جاری کیا ہے۔تھرور نے 28 اکتوبر 2018 کو بنگلور میں ادب فیسٹیول کے دوران کہا تھاکہ مودی شیولنگ پر بیٹھے بچھو کی مانند ہیں۔آپ اسے اپنے ہاتھ سے ہٹا بھی نہیں سکتے اور نہ ہی جوتے سے مار سکتے ہیں۔ ششی تھرور کے اس بیان پر خاصا تنازعہ ہوا تھا اور بی جے پی نے ان سے معافی کا مطالبہ کیا تھا۔اسی معاملے میں دہلی بی جے پی کے لیڈر راجیو ببر نے ان کے خلاف کیس دائر کیا تھا۔