نئی دہلی10جون (ایس او نیوز/آئی این ایس انڈیا) پنجاب کے وزیر اعلی امریندر سنگھ کے ساتھ چل رہے تنازعہ کے درمیان نوجوت سنگھ سدھو نے پیر کو دہلی میں کانگریس صدر راہل گاندھی سے ملاقات کی۔ اس دوران کانگریس جنرل سکریٹری پرینکا گاندھی اور پارٹی کے سینئر لیڈر احمد پٹیل بھی موجود رہے۔ سدھو نے میٹنگ کے بعد ٹویٹ کیا کہ:’کانگریس صدر سے ملاقات کی اور انہیں حالات کے بارے میں مطلع کیا۔ جمعرات کو ہی امریندر سنگھ نے سدھو کی وزارت میں تبدیلی کی تھی۔ پہلے وہ سیاحت اور شہری ترقی کے وزیر تھے۔ سدھو کا محکمہ تبدیل کرنے سے قبل امرندر سنگھ نے حال ہی میں کہا تھا کہ ریاست کے شہری علاقوں میں کانگریس کی کارکردگی اچھی نہیں رہی۔ وزیر کے طور پر سدھو کی کارکردگی کا جائزہ لینے کی ضرورت ہے اور وہ اپنا محکمہ سنبھال پانے کے قابل نہیں ہیں۔ سدھو کے کابینہ اجلاس میں شامل نہ ہونے کے بعد ان کی وزارت میں تبدیلی کی تھی۔ سدھو نے امریندر سنگھ پر نشانہ لگایا تھا۔ انہوں نے کہا تھا کہ شہری علاقوں میں پارٹی کے خراب کارکردگی کے لئے مجھے جان بوجھ کر نشانہ بنایا جا رہا ہے، یہ سراسر غلط ہے۔ صرف میرے ہی خلاف ایکشن کیوں لیا جا رہا ہے؟ شکست کی ذمہ داری اجتماعی ہے۔ پھر باقی لیڈروں وزراء کے خلاف کیوں نہیں؟لوک سبھا انتخابات میں ٹکٹ نہ ملنے پر سدھو کی بیوی نوجوت کور سدھو نے امریندر کے خلاف ناراضگی ظاہر کی تھی۔ انہوں نے الزام لگایا تھا کہ انہیں امریندر سنگھ کی وجہ سے امرتسر سے لوک سبھا کا ٹکٹ نہیں ملا۔ وہیں سدھو نے بھی بیوی کی حمایت کی تھی۔ اگرچہ امریندر نے ان الزامات کو مستردکر دیا تھا۔