بنگلورو،30؍ مارچ (ایس او نیوز)بنگلوروسمیت کرناٹک میں کورونا کے زبردست پھیلاؤ کے پیش نظر ایڈی یورپا کی قیادت والی حکومت نے لاک ڈاؤن کے نفاذ کا انکارکرتے ہوئے کہاکہ ہے کہ ماسک پہننا اور سماجی فاصلے پرہرصورت میں سختی کے ساتھ عمل ہو-

انہوں نے بتایا کہ بنگلورو کے اپارٹمنٹوں میں منعقد ہونے والی مختلف پارٹیوں پر پابندی عائد کردی گئی ہے -اپارٹمنٹوں میں کسی بھی طرح کی پارٹی منعقد نہیں کی جاسکتی - میسور، کلبرگی، جنوبی کینرا اور اُڈپی اضلاع میں 100 پازیٹیو معاملہ منظرعام پر آئے ہیں - اس کی روک تھام کیلئے مناسب اقدامات کئے جائیں گے -

انہوں نے بتایا کہ بروز منگل 30 مارچ سے ماسک پہننا اورسماجی فاصلہ پر عمل لازمی ہوگا- کل سے اگلے 15 دنوں تک ریاست میں کوئی احتجاج اوراجتماع یاریلی نکالنے کی اجازت نہیں - اس کیلئے تمام متعلقہ محکموں کو سخت ہدایت دی گئی ہے - خلاف ورزی کرنے والوں کے خلاف سخت کارروائی کی جائے گی-

ریاستی وزیر اعلیٰ بی ایس ایڈی یورپا نے کورونا کی روک تھام کے اجلاس میں شرکت کے بعد اخباری کانفرنس کو خطاب کرتے ہوئے کہاکہ ریاست کے مختلف مقامات پر کووڈ کیئر مراکز قائم کئے گئے ہیں -5؍اپریل سے یہ تمام مراکز کام کرنا شروع کردیں گے روزانہ زیادہ ٹسٹ کرنے ٹیموں کو تشکیل دیا گیا ہے - اس کام کیلئے محکمہ مال گذاری اورتعلیم کے ملازمین کا استعمال کیا جائے گا- بنگلور سٹی اور دیہی ضلع کے سرکاری اسپتالوں میں 1630 بستروں کا انتظام کیا گیا ہے - یہ بیڈس کووڈ مریضوں کیلئے ریزروہیں - نجی اسپتالوں میں بھی کووڈ مریضوں کا علاج کرنے کی ہدایت دی گئی ہے- انہوں نے بتایا کہ کووڈ مریضوں کے علاج اور اس کی روک تھام کیلئے 1,500 کروڑ روپئے مختص کئے گئے ہیں - انہوں نے بتایا کہ ریاست میں کسی بھی صورت میں کورونا وائرس کی وجہ سے لاک ڈاؤن نہیں کیا جائے گا اس کیلئے اس وباء کو پھیلنے سے روکنا ہے -اس کیلئے عوام کا تعاون بھی درکار ہے -