بنگلورو،15؍اپر یل ( ایس او نیوز ) شہر بنگلور و اور ریاست بھر میں کورونا وائرس کے متاثرین کی تعداد میں بے تحاشہ اضافہ کو دیکھتے ہوئے ریاستی حکومت نے ماہ رمضان کے دوران مساجد میں سماجی فاصلہ اور کو وڈ ضابطہ کی پابندی کے متعلق ایک سرکیولر جاری کیا ہے ۔

محکمہ اقلیتی بہبود کے سکر یٹری پی منی ونن کی طرف سے جاری اس حکم نامہ میں مساجد میں سماجی فاصلہ اور ماسک کی سختی سے پابندی پر زور دیا گیا ہے اور کہا گیا ہے کہ مصلیان وضوگھروں سے کر کے آئیں اور اپنے ساتھ مصلی لائیں ۔ 

یہ بھی کہا گیا ہے کہ 60 سال سے زیادہ عمر والے افراد اور 10 سال سے کم عمر کے بچے گھروں میں ہی نماز ادا کر یں ۔ سماجی فاصلہ کو ایک دوسرے کے درمیان 2 میٹر مقرر کیا گیا ہے اور کہا گیا ہے کہ مسجد میں داخلہ کی نگرانی کی جا ئے تا کہ سماجی فاصلہ پامال نہ ہونے پائے۔ 

اس طرح مسجد کے داخلی دروازوں پر حرارت کی جانچ کرنے کے لئے تربیت یافتہ عملہ کو متعین رکھنے پر زور دیا گیا ہے اور کہا گیا ہے کہ تھر مامیٹر میں اگر جسمانی حرارت 37.5C  یا 99.5F دکھائی دے تو ایسے افراد کو مسجد میں آنے نہ دیا جائے  اوران کو مشورہ دیا جائے  کہ ڈاکٹروں سے رجوع ہوں ۔مساجد کے باہر گاڑیوں کی پارکنگ میں بھی فاصلہ برقراررکھنے پر زور دیا گیاہے۔

یہ بھی  بتایا گیا ہے کہ مساجد میں افطار کے اہتمام کے دوران کھانے کے لئے زیادہ مقدار میں لوازمات لانے سے گریز کیا جائے اور کوشش کی جائے کہ افطار گھروں میں ہی کرلیں۔ تراویح کی ادائیگی میں احتیاط برتی جائے۔ ضرورت پڑے  تو الگ الگ جماعتوں کا اہتمام کیا جائے تا کہ مصلیان کی تعداد زیادہ ہونے پر بھی فاصلہ برقرار رکھا جا سکے۔ مساجد میں صفائی کے اہتمام کی تاکید کی گئی ۔

مساجد کے ذمہ داروں کو ہدایت دی گئی ہے کہ مسجد کے باہر یہ واضح طور پر درج کیا جائے کہ کتنے مصلیان کی گنجائش ہے اور مقررہ تعداد میں مصلیوں کی آمد ہو جائے تو مساجد کے دروازے نماز کی تکمیل تک بند کر دیئے جماعتوں کے لئے امام کا انتظام جائے ۔ 

خاص طور پر سرکیولر میں اس بات پر زور دیا گیا ہے کہ مساجد میں نماز جمعہ کے لئے اضافی جماعتوں کا نظم کیا جائے۔ اس کے لئے محکمہ کی طرف سے اوقات کا مشورہ بھی دیا گیا ہے ۔مساجد کے وضوخانوں کے استعمال کی  صورت میں عام تولیوں کو ہٹانے کی ہدایت دی گئی ہے۔ 

تقریبا 7 صفحات پر مشتمل سرکیولر میں ان تمام کی تفصیل کے ساتھ وضاحت کی گئی ہے جو مساجد میں رمضان کے دوران پابندی کے ساتھ نافذ کرنے ہوں گے۔

اصول و ضبوابط

• مساجد میں سماجی فاصلہ اور ماسک کی سختی سے پابندی پر زور 
• مصلیان وضو گھروں سے کرکے آئیں اور اپنے ساتھ مصلی لائیں
• 60 سال سے زیادہ عمر والے افراد اور 10 سال سے کم عمر کے بچے گھروں میں ہی نماز ادا کریں 
• مسجد میں داخلہ کی نگرانی کی جائے
• مسجد کے داخلی دروازوں پر حرارت کی جانچ پر زور 
• مساجد کے باہر گاڑیوں کی پارکنگ میں بھی فاصلہ برقرار رکھنے پر زور 
• کوشش کی جائے کہ افطار گھروں میں ہی کرلیں
• تراویح کی ادائیگی میں احتیاط برتی جائے