ممبئی ،4؍مئی(ایس او نیوز؍ایجنسی)کورونا وائرس کا قہر اور لاک ڈاؤن کی سختیاں مزدور طبقے کے لئے عذاب جاں بنی ہوئی ہیں،مرکزی حکومت لاک ڈاؤن تھری کا اعلان کر چکی ہے اور مرکزکے ساتھ ریاستی حکومتوں نے لاک ڈاؤن پر عمل بھی شروع کردیا ہے لیکن ان سب سے مزدور کی مشکلات کہیں کم ہونے کا نام نہیں لے رہی ہیں -

مزدوروں کو ان کے وطن بھیجنے کے لئے ریاستی حکومتوں کے ذریعہ قدم تو اٹھایا گیا ہے لیکن ملک کی مختلف ریاستوں میں جس بڑی تعداد میں کورونا لاک ڈاؤن میں مزدور پھنسے ہوئے حکومتوں کی یہ کوششیں ان کے لئے نا کافی ثابت ہو رہی ہیں -اندور کے ساویر میں ایک دل دہلا دینے والا معاملہ سامنے آیا ہے-

اندور ساویر ہائی وے پر ایک مکسر مشین کو جب پولیس نے روک کر چیک کیا تو مشین کے اندر سے18 مزدور نکلے-یہ مزدور کورونا لاک ڈاؤن کے سبب ممبئی میں پھنس گئے تھے اور جب انہیں زندگی بچانے کا کوئی راستہ نظر نہیں آیا تو وہ مکسر مشین میں ہی سوار ہو کر گھر کے لئے نکل پڑے-یہ مزدور ممبئی سے لکھنؤ کے لئے جا رہے تھے-

ڈی ایس پی اوما کانت چودھری کے مطابق گاڑی چیکنگ کے دوران جب مکسر مشین سے اٹھارہ مزدور نکلے تو وہ دیکھ کر دنگ رہ گئے-اس میں سے14 مزدور اور 4 گاڑی کے ساتھ کام کرنے والے ہیں -گاڑی ڈرائیو کے خلاف ساویر پولیس نے معاملہ درج کرلیا ہے-ان مزدوروں کے کھانے اوردوسرے انتظامات کے ساتھ انہیں کورینٹائن کردیا گیاہے-