نئی دہلی، 7/مارچ (ایس او نیوز /ایجنسی) الیکٹورل بانڈ سے متعلق تفصیلات دینے کے لیے ایس بی آئی کے ذریعے 30 جون تک کا وقت طلب کرنے کے خلاف ایک این جی او نے سپریم کورٹ میں توہین عدالت کی عرضداشت داخل کی ہے، جس پر ایس بی آئی کی درخواست کے ساتھ ہی سماعت ہونے کی امید ہے۔ یہ عرضداشت سپریم کورٹ کے سینئر وکیل پرشانت بھوشن کے ذریعے داخل کی گئی ہے۔

غیر سرکاری تنظیم ’ایسوسی ایشن فار ڈیموکریٹک ریفارمس‘ (اے ڈی آر) کے ذریعے داخل کی گئی اس عرضداشت پر سپریم کورٹ سماعت کے لیے تیار ہو گئی ہے۔ چیف جسٹس ڈی وائی چندرچوڑ کی صدارت والی بنچ نے اے ڈی آر کی جانب سے پیش ہوئے سینئر وکیل پرشانت بھوشن کی توہین عدالت پر سماعت سے متعلق دلیلوں کو سننے کے لیے رضامندی ظاہر کر دی ہے۔ سپریم کورٹ کے سینئر وکیل پرشانت بھوشن کے مطابق ایس بی آئی کی درخواست 11 مارچ کو سماعت کے لیے فہرست میں شامل ہونے کی امید ہے اور توہین عدالت کی عرضداشت پر بھی اسی کے ساتھ سماعت ہونی چاہئے۔ اس پر چیف جسٹس نے کہا ہے کہ ’’برائے مہربانی ای میل بھیجئے، میں حکم جاری کروں گا۔‘‘

واضح رہے کہ ایس بی آئی نے 4 مارچ کو سپریم کورٹ سے درخواست کی تھی کہ الیکٹورل بانڈ کی تفصیل دینے کے لیے عدالت کے ذریعے جو مدت دی گئی ہے اسے 30 جون تک بڑھایا جائے۔ عدالت نے گزشتہ ماہ اپنے ایک فیصلے میں ایس بی آئی کو الیکٹورل بانڈ سے متعلق پوری تفصیل 6 مارچ تک الیکشن کمیشن کو دینے کا حکم دیا تھا۔