نئی دہلی، 27/مارچ (ایس او نیوز/ایجنسی) کانگریس پارٹی نے راہل گاندھی کی پارلیمنٹ کی رکنیت ختم کرنے کے خلاف آج سے ’آئین بچاؤ تحریک‘ شروع کرے گی۔ کانگریس جنرل سکریٹری جے رام رمیش نے بتایا کہ بلاک، تحصیل، ضلع سطح سے لے کر راجدھانی تک احتجاج کیا جائے گا۔ انہوں نے کہا کہ راہل گاندھی کو اڈانی گھوٹالے کے خلاف آواز اٹھانے پر نشانہ بنایا گیا ہے۔

اس سے پہلے اتوار کو جہاں کانگریس نے راج گھاٹ پر ستیہ گرہ کرکے احتجاج کیا تھا، وہیں آج پارلیمنٹ میں بڑے پیمانے پر احتجاج کرنے کا فیصلہ کیا ہے۔ اس کے تحت پارٹی کے تمام ممبران پارلیمنٹ آج کالے کپڑے پہن کر پارلیمنٹ پہنچیں گے اور اپنا احتجاج درج کرائیں گے۔ اس احتجاج میں کانگریس نے دیگر اپوزیشن جماعتوں سے بھی اپیل کی ہے کہ وہ کالے کپڑے پہن کر یا کالی پٹیاں باندھ کر پارلیمنٹ میں آئیں اور اس احتجاج میں شامل ہوں۔

دریں اثناء راجیہ سبھا میں اپوزیشن لیڈر اور کانگریس صدر ملکارجن کھڑگے نے آج صبح 10 بجے راجیہ سبھا میں اپوزیشن جماعتوں کے قائدین کی میٹنگ اپنے چیمبر میں بلائی ہے تاکہ پارلیمنٹ میں اپوزیشن جماعتوں کی حکمت عملی پر تبادلہ خیال کیا جاسکے۔

وہیں، اتوار کو کانگریس نے راہل گاندھی کو لوک سبھا سے نااہل قرار دیئے جانے کے خلاف ملک بھر میں 'سنکلپ ستیہ گرہ' کیا۔ دریں اثنا، دہلی کے راج گھاٹ پر کانگریس کے صدر ملکارجن کھڑگے نے راہل گاندھی پر او بی سی کی توہین کرنے کا الزام لگانے پر بی جے پی پر حملہ کیا اور پوچھا کہ جب نیرو مودی اور للت مودی جیسے بھگوڑوں پر تنقید کی جاتی ہے تو انہیں تکلیف کیوں ہوتی ہے۔