بنگلورو،17/فروری (ایس او نیوز) کانگریس ہائی کمان نے کے پی سی سی کے نئے صدر کے تقرر کا معاملہ تقریباً حل کردیاہے۔ ذرائع کی مانیں تو  قوی امکان ظاہر کیا جارہا ہے  کہ اگلے ہفتہ ڈی کے شیوکمار کے پی سی سی صدر کی حیثیت سے عہدہ سنبھالنے والے ہیں اورلنگایت طبقہ کے اہم اورسینئر لیڈر شری ایم بی پاٹل کو کے پی سی سی کانیاکارگزار صدر مقررکیاجانے والا ہے۔

باوثوق ذرائع سے ملنے والی اطلاعات کے مطابق کانگریس ہائی کمان نے کرناٹک کی تین بارسوخ ذاتوں، وکلیگا،لنگایت، اور اہندا طبقہ کو اپنے ساتھ رکھنے کے لئے ایک منصوبہ بنایاہے اوراس منصوبہ کے تحت ہی کے پی سی سی کے اہم عہدے سونپے جانے والے ہیں اوران طبقات کابھرپور اعتماد حاصل کرناچاہتی ہے۔ اہندا طبقہ سے تعلق رکھنے والے سابق وزیراعلیٰ سدارامیاکواسمبلی میں اپوزیشن لیڈر کا عہدہ بحال رکھا جارہاہے اورانہیں سی ایل پی لیڈر کاعہدہ بھی سونپا جارہاہے پارٹی لیڈروں نے محسوس کیاہے کہ سدارامیا سے اگریہ عہدے چھینے جائیں گے تو ریاست میں اس سے کانگریس پارٹی کو نقصان پہنچ سکتاہے۔ بی جے پی میں لنگایت طبقہ کے لیڈر ایڈی یورپا کو وزیراعلیٰ کاعہدہ دیئے جانے پر اس طبقہ کو کانگریس ناراض نہ کرنے اوراپنے ساتھ بنائے رکھنے کے لئے لنگایت لیڈر ایم بی پاٹل کو کے پی سی سی کاکارگزار صدر نامزد کیاجانے والا اور وکلیگا طبقہ کے لیڈر ڈی کے شیوکمار کو کے پی سی سی صدر کاعہدہ دیاجارہاہے،ایشورکھنڈرے جواس وقت کارگزار صدر کے عہدہ پر ہیں انہیں پارٹی میں دوسری اہم ذمہ داریاں سونپی جانے والی ہیں۔